Sámediggi gohkke buoremusaid sámi beroštumiid Fefos
Lea go dasto Deanu Bargiidbellodagas dušše dušši ballu, ahte romsalaččat bohtet buot stivret?
Deanu Bargiidbellodat lea áibbas vuostá rievdadit Finnmárkolága nu go ráđđehus lea evttohan, ahte Finnmárkku ássit galget ain beassat stivret Finnmárkkuopmodaga (Fefo) maŋŋel go Tromsa ja Finnmárku leat ovttastahtton oktan regiovdnan. Romssa beali politihkkárat dan ođđa fylkkadikkis galget leat mielde válljemis golbma áirasa Fefo stivrii, muhto ain bissu gáibádus ahte Fefo áirasiin galgá ruovttučujuhus Finnmárkkus. Bearráigeahččanlávdegotti áirasa galget maid válljet, muhto dan olbmo orrunbáiki ii namuhuvvo evttohusas.
Dálá láhka addá maiddái Fefo stivrii lobi juohkit badjebáhcaga fylkkadiggái, Sámediggái ja eará oktasaš ulbmiliidda fylkkas. Vaikko Romssa beale politihkkárat maiddái besset boahtteáiggis mearridit makkár doaimmaide badjelbáza galgá juolluduvvot, de biddjo láhkaárvalusas gáibádussan ahte ruhta galgá addot dálá Finnmárkku fylkka álbmogii buorrin. Dát ii leat Deanu Bargiidbellodaga mielas doarvái buorre, go Finnmárkkuopmodaga (Fefo) ásahemiin lei ulbmil, ahte finnmárkulaččat galge šaddat «hearrán iežaset dálus».
Deanu Bargiidbellodat hilgu oalát ráđđehusa evttohusa, ja gáibidit baicce áibbas eará lágan vuogádaga. Sin mielas lea buoremus modealla, ahte ásahuvvo áirrasgoddi mas leat Finnmárkku suohkaniid ovddasteaddjit geat válljejit lahtuid Fefo stivrii, válljejit olbmo dárkkistanlávdegoddái, ja hálddašit badjelbáhcaga, ja muđui váldet badjelassii daid Fefo bargguid mat dál gullet fylkkagildii. Dan áirrasgoddái galget áirasat nammaduvvot suohkaniid olmmošlogu ja eanansturrodaga mielde. Lea álki oaidnit Deanu Bargiidbellodaga ákkaid, ahte mot sihkkarastit finnmárkulaččaid beroštumiid Fefos.
Lea aŋkke dan láhkai, ahte Finnmárkoláhka oktan Fefo ásahusain ii leat ásahuvvon finnmárkulaččaid ovdabargguid dihte, muhto sápmelaččaid vuoigatvuođaid rahčamušaid olis, Álttá-stuimmiid áigge. Lea go dasto Deanu Bargiidbellodagas dušše dušši ballu, ahte romsalaččat bohtet buot stivret? Dan dieđus eai daga, go Deanu Bargiidbellodat orro oalát vajálduhttime, ahte beali stivrraáirasiin Fefoi vállje Sámediggi. Ii ge leat dušše Finnmárkku ássi sámediggeáirasat geat válljejit lahtuid dohko, muhto dan dahket buohkat geat čohkkájit dievasčoahkkimis beroškeahttá gos orrot. Dan rádjái lea goit dat doaibman bures vaikke Sámediggi áirrasjuohku lea geográfalaččat ollu stuorát ja viidát go dat ođđa davvi regiovdna. Jáhkkit Sámedikki ain buoremusat máhttit sámiid beroštumiid gohkket Fefo vuogádagas, ja dalle lea ge gažaldat, ahte lea go buorre sápmelaččaide dakkár áirasgoddi mas aivve čohkkájit finnmárkulaččat.