– Mii dolastit beaivvi miehtá
Boandda Jon Evald Haetta dálu elrávdnjerehket lei sullii 13 000 ruvnno maŋemus mánu, muhto sus lea ge stuora dállu ja návet maidda dárbbaša elrávnnji.
Maŋemus rehket, man Jon Evald Haetta gárttai máksit elrávnnji ovddas, lei ollu eanet go eará ásodateaiggádat mákset. Sus lea hui stuora viessu ja stuora návet maid lea stuorideame.
13 000 ruvnno
Son jáhkká okta oasáš dan stuora rehkegis lea go son lea stuorideame náveha.
– Mannan mánu elrávdnjerehket olles dálus oktan návehiin lei 13 000 ruvnno. Mii geavahit elrávnnji nu go dábálaččat lávet, muhto ii leat áibbas dábálaš ahte rehket láve ná allat, lohká Haetta.
Son viežžá muoraid muorrameahcis ja dolasta ollu. Dan dihte lei elrávdnjerehket sullii 5000 ruvnno mannan mánu.
– Mis lea dieđusge elrávdnjeliekkas viesus, muhto mii dolastit ollu muoraiguin. Iđđedis eahkedii lea dolla ommanis, dadjá son. – Gusain ja elliin boahtá liekkas, ja birgejit dainna lieggasiin maid ieža buvttadit. Návehis ii leat liekkadeapmi, muhto gollá elrávdnji mašiinnaide ja liekkadankábeliidda mat leat eará lanjain návehis, čilge boanda.
Galggašii leat čeahpit
Son lohká fertet beare máksit rehkega, ja jáhkká oažžut fas ruovttoluotta náveha ja garáša lassiárvodivadis.
– Ferten mieđihit ahte in jurddáaš nu hirbmadit elrávdnjegeavaheami birra, muhto galggašin leat čeahpit jáddadit čuovggaid lanjain maid eat geavat. Mis ferte leat liekkas muhtin lanjain. Lea stuora viessu, ja elrávdnji manná ollu, muitala Haetta.