– Muoraid haga gal ii oba birge ge dáppe
– Mu bárdni ja mu viellja leaba geasi murren ja geasehan birrasii 20 tráktorguorpmi boaldenmuoraid, lohká Risten Elle Siri, gii orru Ákšomuotkkis.
Risten Elle Siri orru sullii miilla eret Guovdageainnus, Ákšomuotkkis. Son muitala ahte sii barget hui ollu ovttas muoraiguin.
– In ieš okto gal murre, muhto mii buohkat bargat muoraiguin fárrolaga. Mu bárdni ja mu viellja leaba geasi murren ja geasehan daid. Go ollejit viesu rádjái, de mii fárrolaga sahet ja bordit daid, lohká son.
Mannan geasi gárte 20 tráktorguorpmi boaldenmuorat maid murrejedje olles bearrašii, geat orrot máŋgga dálus.
– Ii elrávnnji haga birge
Su maŋemus elrávdnjerehket lei sullii 3200 ruvnno, ii ge loga dan surgehan iežas.
– Ii elrávnnji haga birge, in ge jurddaš lea go divrras vai hálbi. Lea nu go diesel ja bensiidna, mii dárbbašit dan. Go lea buolaš, de ferte bidjat biilii mohtorlieggasa, lohká Siri.
Su mielas baicce sáhttá surgehit go gullá mediaid bokte ahte dál sáhttá gártat alla elrávdnjerehket, muhto dattetge ii loga eará ládje áigut rievdadit elrávdnjegeavaheami.
Jáddada liekkadanpumppe
Sus lea liekkadanpumpe mainna doallá lieggasa viesus. Galgá oalle buolaš leat ovdal go dan jáddada.
– Gulan go liekkadanpumpe ráhčágoahtá, de gal jáddadan dan, lohká son.
Viesu liekkada eanemusat muoraiguin, ja muitala ahte sii boldet eanemusat muoraid. Feaskáris lea unna pánelommanaš maid mii liekkada.
– Eat mii goit birge muorraommana haga dáppe, dadjá son.