Digaštallan-kampánja #metoo birra
Davviriikkat bidjet oktii návccaid bargat seksuálaloavkašuhttima vuostá.
Journalista ja girječálli Alexandra Pascalidou lea njunnošis Davviriikkaid «digaštallanstafeahtas» metoo birra. Davviriikkaid kulturministarat háliidit čohkket gávcci riikka návccaid ja oahppat mo guđege riikkas dustejedje hástalusaid mat čuožžiledje #metoo-báru oktavuođas. Ulbmilin lea gávdnat reaidduid mainna nagodit rievdadit dili.
#metoo-kampánja leavai viidát
Interneahttakampánja #metoo lea ožžon miljovnnaid mielde olbmuid miehtá máilmmi muitalit seksuála loavkašuhttima birra. Miehtá máilmmi leat nisson neavttárat, journalisttat, musihkkárat ja earát muitalan mo leat vásihan seksuála loavkašuhttima bargosajis. Nissonat leat beassan interneahtas čoahkkanit seamma fáddágilkora duohkái ja muitalit iežaset vásáhusaid birra.
Rievdadit struktuvrraid
Davviriikkaid ráđđi čilge preassadieđáhusas ahte kulturministarat dáin riikkain háliidit rievdadit daid struktuvrraid kultursuorggis mat leat dahkan vejolažžan seksuála loavkašuhttima bargosajis.
Álggahuvvo odne
«Digaštallanstafeahtta» álggahuvvo Helssegis odne, guovvamánu 4. beaivvi. Dasto sirdet Ålándii ja viidáset daidda eará davviriikkaide, ovdal go loahpahit digaštallanráiddu Ruonáeatnamis maŋit vahkku. Digaštallamat leat rabas almmolašvuhtii, ja daid sáhttá čuovvut interneahtas ja sosiála mediain fas ohcat fáddagilkora #metookultur.