– Tromssa sámeskuvlii galgá gávdnot čoavddus
Mikkel Eskil Mikkelsen lohká iežaset leamaš čoahkkimiin Sámeskuvllain mii dál lea áitojuvvon garrasit, go mánát eai šat galgga oažžut beaivválaš skuvllasáhtu.
– Sámediggeráđi mielas lea hui dehálaš ahte skuvla ain bisuhuvvo, go doppe barget nu dehálaš barggu guovllu sámegiela ja kultuvrra bisuheamis. Sámeskuvlla sáhttu ii galgga šaddat spábba man bálkkodit guovtteguvlui eiseválddiid gaskkas ovddasvástádusa dáfus. Mii bidjat dál návccaid čoavdit dili, dadjá Mikkelsen.
Ođđa dulkon lágas
Tromssa sámeskuvla Málatvuomis lea internáhttaskuvla mas leat 21 oahppi, geat bohtet máŋgga iešguđet suohkanis. Eanas mánáin lea máŋggaid miillaid guhku skuvlamátki, guhkimus lea gávcci miilla ovtta guvlui. Internáhtta fállá idjadeami dušše guktii vahkus.
Dál lea Oahpahusdirektoráhtta rievdadan njuolggadusaid dulkoma, das mii gullá skuvllabiirii ja skuvllasáhttui. Sámeskuvla ii galgga sin oainnu mielde šat leat lagasskuvla olles Tromssa fylkka ja Davvi-nordlándda guvlui. Ja go ii leat lagasskuvla, de ii leat fylkkasuohkana geatnegasvuohta ruhtadit sáhtu eará go bearjadagaid ruoktot, ja mánnodaga fas skuvlii. Muđui vahkkus galget mánáid ruovttusuohkanat máksit sáhtu, ođđa gollu mii máksá gitta 800 000 ruvdnui suohkaniidda mat juo bággehallet seastit.
Heaittihanáitta
Sámeskuvlla sadjásaš rektor, Åse Merete Triumf Andersen, lohká ášši dál duođalažžan, go skuvllasáhtu haga nohket oahppit ja nu sáhttá olles skuvla guorranit.
Ohcá čovdosiid
Sámediggeráđđi ii loga gal Sámedikki galgat ruhtadišgoahtit skuvlla, vaikko sin mielas lea dát máilmme dehálaš ášši.
– Ii sámediggi gal doaimmat skuvlla. Lea stáhtalaš skuvla, ja Fylkkamánnis lea dehálaš ovddasvástádus áššis. Mis leat jeavddalaččat čoahkkimat sihke Tromssa fylkkasuohkaniin ja oahpahusdepartemeanttain ja maiddái gulahallat direktoráhtain.
Málatvuomi suohkan galgá iežaset dieđuid mielde sádden ohcamuša stáhtii, oažžut liige doarjaga, lagabui guokte miljovnna ruvnno skuvllasáhttui.
– Jus dainna ohcamušain eai olat, de mii leat veahkkin ohcame eará vuogi gádjut dili, dadjá sámediggeráđđi.