OĐĐA LÁVDIN sámi artisttaide
– Sámi álbmotbeaivi lea šaddan
Álttá sámi musihkkavahkku jođiheaddji, Klemet Anders Buljo, mielas lea Sámi álbmotbeaivi šaddan dehálaš lávdin sámi artisttaide. Loga muđui Sámi ihtá álbmotbeaivvi doaluid birra
– Oažžu ovtta ládje lohkat ahte Sámi álbmotbeaivi lea šaddan dego ođđa lávdin, ja oalle dehálaš lávdi vel sámi artisttaide. Dahje dalle lea lunddolaš ahte čájáhallet min sámi artisttaid go dalle ožžot artisttat ollu beroštumi mediain ja muđui, dadjá Álttá sámi musihkkavahkku jođiheaddji, Klemet Anders Buljo.
Sámi Musihkkavahkku oktavuođas oaidná Buljo ahte sámi musihkka beaggá viidát. Dan oaidná maid go olgoriikka dovddus ja beakkán musihkkabuvttadeaddjit maid leat čájehišgoahtán beroštumi sámi musihkkii.
– Okta musihkka buvttadeaddji boahtá Bangkokas ja nubbi fas Englánddas, ja leat dakkár stuorra buvttadeaddjit geat leat bargan stuorra násttiiguin nu go Madonnain, Britney Spearsain, Bjørkain, Sealain ja nu ain. Sii leat vuolgán guldalit sámi musihka, dadjá Buljo.
– Ođđa áigi boahtime
Buljo oaivvilda ahte dál lea ođđa áigi boahtime, musihka dáfus.
– Sámi artisttat fertejit ráhkkanit, sii geat leat gergosat lávket stuorát musihkkalávddiide.
Resirkulert ovttaoaivilis
Sámi musihkkajoavku Resirkulert čuojaha Olmmáivákkis Sámi álbmotbeaivvi. Sin lávlu, Emil Karlsen, lea ovttaoaivilis Klemet
Anders Buljoin ahte Sámi álbmotbeaivi lea šaddan ođđa lávdin sámi artisttaide.
– Danin go dalle besset sii čuojahit sin iežaset álbmogii, ja soitet olahit vel eanet guldaleddjiide, ja maiddái juogadit vásáhusaid eará artisttaiguin, dadjá Emil Karlsen.
– Sámi álbmotbeaivvi haga eai livčče ná ollu konsearttat
Karlsen ii loga jáhkkit ahte livčče leamaš nu ollu konsearttat sámi artisttaiguin álggogeahčen guovvamánu, jus ii livčče leamaš Sámi álbmotbeaivi.
– Jáhkán dan maid veahkehit ollu go stuorát gávpogiin lágiduvvojit sámi vahkkut, olles dan guđat vahkku guovvamánus. Dan mun jáhkán maid hui buorren, dadjá Karlsen.
Son jáhkká dat lea buorre danin go de oažžu sámi musihkka vel eanet fuomášumi, iige dušše dan ovtta beaivvi. De besset maid iešguđet artisttat ja joavkkut čuojahit iešguđet guovlluin, lasiha son.