Nuorra nieida ribahii nohkkat olggos buollašis mannan ija

Loga sotnabeaivvi čuovganeami dáhpáhusaid birra Finnmárkkus, maid politiijat leat ferten čoavdit.

Hámmárfeasttas:

Politiijat leat váldán gitta muhtin 58-jahkásaš dievddu ja áššáiduhttán su go lea cápmán nuppi dievddu gii lea 53 jahkásaš. Dáhpáhus lei muhtin bárttas Riehponávžžis.

Hámmárfeastta gávpotguovddážis dieđihuvvui muhtin hoteallas ahte sis lea muhtin guossi gii muosehuhttá earáid. Guossi, 34-jahkásaš dievdu, oaččui sáhtu politiijaid mielde ruoktot, dieđihit politiijat Twitteris.

Báhcavuonas:

Politiijat vižže muhtin 71-jahkásaš dievddu, gii lei badjelmeare gárihuvvan, ii ge lean bures boahtin soapmása viesu lusa. Politiijat válde dievddu mielde ja vuojistedje su ruoktot.

Álttás:

Guokte polenlašdievddu eaba gárron guođđit olgobáikki ovdal go politiijat bohte. Politiijat ožžo dan guoktása nama ja oaččuiga dieđu guođđit báikki, ii ge mannat šat dohko dan ijas.

Eibos leat politiijat ferten loahpahit feastta priváhta ásodagas go ledje nu ollu alla jienat doppe. Muhtin 18-jahkásaš nuorra nieida, lei ribahan nohkkat olgobeallai muhtin rámbuvrra buollašis. Politiijat dieđihit ahte nieidda dolvo doaktára lusa iskkosii, go ieš ii lohkan leat áibbas buori vuoimmis. Olgun lei 17 buolašceahki.

Politiijat leat čuvodan ovtta biilla mii bisánii politiijaide oalle johtilit. Politiijat leat áššáiduhttán dievddu, 24-jahkásaš biilavuoddji, go galgá leat vuodján gárrendilis. Politiijat dutket ášši viidáseappot.

Kronstad báikkis dieđihuvvui feastariedja ja politiijat loahpahedje feastta. Politiijat lasihit ahte maŋemus mánuid leat máŋggas váidán feastariejaid seamma ásodagas maŋemus mánuid.

Eará báikkis Álttás leat politiijat ožžon dieđu ahte muhtin dievdu lea aggresiiva muhtin visttis, gos leat máŋga ásodaga. Politiijat fitne báikkis ja leat čoavdán soabatmeahttunvuođa, dieđihit politiijat Twitteris.

Čáhcesullos:

Politiijat fertejedje gohččut feastamanniid guođđit ovtta priváhtaásodaga gos ledje maid leamaš vuolleahkásaččat.