– Ollu suovva, muhto
Mannan vahkkus lei sámi dolastallan fáddán, ja dollačeahppi Áilen Nigá Máhtte oahpahii mánáid ja nuoraid dolastallama birra.
Deanu sámeskuvlla oahppi Inger Marianne Vedhugnes Hjelløkkena mielas lei mannan vahkku somás skuvlabeaivvi go besse oahppat sámi árbevirolaš dolastallama. Son lei okta sis geat návddašedje lávus čohkkát, ja veahkehii dollačeahpi, kárášjohkalačča Áilen Nigá Máhte, Mathis N. Eira, dikšut dola vai ii játta.
– Hui ollu suovva lei lávus, muhto liekkas ja somás skuvlabeaivi, lohká Inger Marianne Vedhugnes Hjelløkken. Son návddašii iđittiimmuid lávus olggobealde Deanu joatkkaskuvlla.
Somás skuvlabeaivi
Ledje badjelaš logi galbmaceahki mannan duorastaga Deanus ja ledje olggobeallái Deanu joatkkaskuvlla ceggen lávu, gos mánát návddašedje beaivvi. Inger Marianne mielas lei Áilen Nigá Máhtte čeahppi.
– Hui somás skuvlabeaivi, gánske mun čájehan eadnái ja áhččái maid lean oahppan, moddjesta Inger Marianne, guhte lei hui áŋgir jearahit Áilen Nigá Máhte ja guldalit maid son muitalii lávus.
Fearkut
Arin Oliver Gaupa mielas lei maid gelddolaš skuvlabeaivi. Son lohká iežas oahppan fearkut muoraid.
– Go geargat fearkumiin, de mii cahkkehat dola, dadjá Arin.
Ollu oahppan
Deanu joatkkaskuvlla oahppi Johan Jernslettena mielas maid lea prošeakta gelddolaš. Son vázzá beatnatvuodjinlinjjás ja lohká dolastallama hui ávkkálažžan go sii leat ollu meahcis.
– Somá oahppat mo galgá dolastallat. Lei ollu maid in diehtán ja ain lea issoras ollu maid in dieđe. Leat olu ođđa sánit maid geahččalan muitit. Lea hui somá go maiddái mánát besset oasálastit prošektii, lohká Johan Jernsletten.
Dárbbašlaš oahppat
Čakčamánus diibmá álggahii Deanu joatkkaskulla proešavtta «Árbediehtu». Dan prošeavtta sisdoallu lea sámi eanandoalu ja meahcásteami máhtolašvuohta. Sámi dollakultuvra lea oassin das. «Árbedieđus» oassálastet Deanu skuvlaoahppit ja mánáidgárdemánát.
– Mu mielas orru hui dárbbašlaš prošeakta mánáide ja nuoraide. Nu go árbevirolaš dolastallan lea, de galgá olmmoš earret eará muoraid fearkut. Dán áigge lea dat vuohki vajálduvvan. Dán áigge fievrridit olbmot mielde muorraseahkaid mas lea goikemuorat. Dás čájehan mo dolin luonddus birgejedje go ledje beare njuoska muorat, dadjá dollačeahppi Áilen Nigá Máhtte.
Oaivedilot
Áilen Nigá Máhtte čájehii álggus gitta lohppii mo galgá dola fidnet, seammás go geavahii doahpagiid mat leat čadnon sámi árbevirolaš dolastallamii.
– Lávus leat árrangeađggit dábá-