Ollugat leat vuordán Sančuari ođđaseamos skearru
Olbmot ostet sin ođđa musihka dego varas láibbi, ja gaskkohagaid lei oalle ráidu rámbuvrra feaskáris gosa leigga čohkkedan lávvordaga čállit autográfaid ođđa skearru olggožii.
Guokte jagi áigi álggii Sánčuari bargat studios ođđa skearruin, muhto de fáhkka bisánii bargu buozalmasvuođa dihte, ja guhká lei eahpesihkarvuohta movt dál šaddá dás viidáset. Áigi lea gollan ja skearru, man ollugat leat vuordán, lea dál oažžumis.
Dego varasláibi
Lávvordaga leigga Heaika Haetta ja Svein Egil Oskal boahtán Guovdageainnu biebmogávpái vuovdit ođđa skearru. Olbmot ledje ráiddus vuordime ja gergosat oastit dan ođđa skearru measta ovdal go leigga ollen čohkkedit.
– Vuosttaš vihtta minuhta manne oalle ollu skearru, lohká Heaika Haetta ja mojohallá. Soai áiguba čohkkát rámbuvrra feaskáris máŋga diimmu, go olbmot ain bohtet skearru oastima ulbmiliin.
Skearru johtá dego varas láibi, nu go lea dadjanvuohki. Sotnabeaivvi muitala Haetta ahte leaba vuovdán jo moadde čuođi skearru, ja lea dušše jándora áigi go almmuheigga skearru. Áibbas čielggas ii leat lohku vel man olu leaba jođihan.
– Gággan biilla johtui buollašis
Okta dain vuosttaš gávppašeddjiin lohká iežas stuora fansan. Sus lei bággu gággat biilla johtui vaikko lea buolaš, go gulai ahte skearru lei gávdnamis oktan Sančuari giehtačállojuvvon namaiguin.
– Gal dát lei oba somá go ođđa skearru bođii ja go beassážiid galget čuojahit. De gal illudan beassážidda issorasat, lohká Inga Karen Anne Triumf Ávvirii. Son muitala ahte son manná buot Sančuari konsearttain go čuojahit.
Ieža ferten oasi bidjat
Svein Egil Haetta lea movttet dál go skearru lea ilbman ja illuda fas lávdái njuiket ja čuojahit ođđa musihka.
– Mii leat ieža bidjan ruđa buvttadit dán skearru, go almmolaš doarjagat eai govčča olles buvttadeami, lohká Haetta Ávvirii.
Svein Egil Oskal čilge ahte skearru vuovdima bokte sáhttet gokčat osiid maid ieža leat bidján musihkkabuvttadeapmái.
Konsearta lahkona
«Sarvvagalba» skearrus leat 14 luođi ja lávlaga, ja leat oahpes Sančuari folk-rock hámi šuoŋat ja ritmmat.
Dat lea báddejuvvon sihke Guovdageainnus ja Stockholmmas, ja buvttadeaddji lea Heaika Haetta.
Skearrus leat muđuid ollu namat geat leat mielde sihke čuojaheame, lávlume ja muđuid buvttadeamis.
Beassážiid áigge lea Sančuari gearggus lávket fas lávddiide, ja čuojaha sihke Guovdageainnus ja Heahtás.