Vuittii fas Nm-golli
Signe Marie Fidje Store vuittii fas Nmgolli heaibumis. Dál son ráhkkanišgoahtá EM- ja Mm-gilvvuide.
Sp. 09 searvi Oslos lágidii NMgilvvuid heaibumis mannan vahkkoloahpa ja Deanu heaibu, Signe Marie Fidje Store, faskii fas Nm-golli. Son ii loga ieš diehtit galle Nm-golli sus leat.
– Vaikko NM lea gilvu man mun galggan vuoitit, de lea álo somá vuoitit ja šaddat Norggameašttirin. Ja de lea vel dieđus hui somá go dien mutto álkit nagodan vuoitit, muitala Fidje Store.
Fidje Store vuittii Nm-golli nu ahte ii oktage su gilvaleddjiin nagodan sus váldit čuoggá. Son muitala iežas vuoitán buot gilvvuid go oaččui vuostálasti láhttái vuosttaš vuorus jo.
Orru olgoriikkas
Signe Marie Fidje Store orru dál Kanadas gos son beassá hárjehallat alit dásis vahkkosaččat. Son bođii Norgii beaivvi ovdal gilvvuid ja nu ii báljo oađđán ija ovdal gilvvuid.
– Mun lean hui duhtavaš Nm-golliin dan dihte go mus lei hui lossa «jetlag» dan beaivvi go heibon. In oađđán go guokte diimmu ija ovdal gilvvuid ja mu heaibumat eai lean nu árrat beaivvis go sávven, muitala son.
Stuora mihtut
Ovddos guvlui lea Deanu nieida bidjan alcces mihtuid, ja stuorimus mihttu lea beassat mielde ja dahkat bures Tokyo Olympiagilvvuin 2020:s. Muhto ovdal dan leat eará gilvvut vuordimis.
– Dál ovddos guvlui leat hárjehallamat ja smávit gilvvut vuordimis. Lean gilvvohallame Ruoŧas ja Bulgárias, ja dain gilvvuin ferten oažžut buriid bohtosiid vai beasan mielde Em-gilvvuide mat leat Románias ovdalaš beassážiid. De diehttelasat berren oažžut buriid bohtosiid EM:S vai beasan mielde Mm-gilvvuide, dadjá Fidje Store.
Son muitala alddis buori doaivaga olihit buriid bohtosiid Emja Mm-gilvvuin, go dál son beassá hárjehallat bures vahkkosaččat ruovttus Kanadas. Son muitala vuohttit buori ovdáneami hárjehallamis.
– Mun lean váillahan buriid hárjehallanvejolašvuođaid ja lean iežan mielas bargan buot maid sáhtán vai ovdánan heaibumis.
Ii leat riikajoavkkus
Fidje Store, gii ii beassan mielde Norgga riikajovkui, jurddaša ieš ahte soaitá buorre go ii beassan mielde. Son loaktá bures iežas ođđa birrasis.
– Lihttu ii leat vel váldán mu mielde riikajovkui. Muhto mun lean dakkár gii liikon jurddašit ahte buot dáhpáhuvvá juoga man nu dihte. Soaitá buoret ahte in leat mielde riikajoavkkus, dadjá son.
Heaitá maŋŋel OG?
Fidje Store muitala iežas váillahit iežas olbmáid ja bearraša ruovttus Deanus, muhto lohká iežas loaktit bures Kanadas.
– Mun lean ožžon buori fierpmádaga Kanadas ja lean heaibuma geažil fárren dohko. Dál lea Tokyo 2020 mii lea jurdagiin ovddos guvlui, ja dan maŋŋel lea jurdda heaitit heaibumis. Muhto dieđusge sáhttet olbmos rievdat plánat, muitala son.
Sivvan dasa go árvvoštallá heaitit lea ahte lea váttis ruđalaččat eallit heaibumiin go heaibun lea valáštallan mas ii leat ollu ruhta.
– Lea váttis sponsoriid ektui maid, nu ahte šattan ieš bidjat hui ollu ruđa valáštallamii, loahpaha Signe Marie Fidje Store.
Čoaggit medáljaid
– Signe Maries leat buorit vejolašvuođat beassat mielde EM-, MM- ja Olympiagilvvuide ja mii gulahallat suinna dan birra. Mii maid bovdet su mielde hárjehallamiidda maid mii lágiidit, dadjá Heaibunlihtu valáštallanhoavda, Jacob Haug.
Haug deattuha ahte sii čuvvot dárkilit buot bohtosiid ja oidnet ge nu ahte Fidje Store lea okta heaibuin gii sáhttá beassat mielde riikajovkui boahtteáiggis.
– Nu go dál lea dilli, de leat riikajoavkkus njeallje nieidda, ja Signe Marie deaivvai ja časkkii ovtta sis NM:S, dadjá son ja loahpaha:
– Mii leat bidjan eaktun ahte dat gii áigu EM:I, ferte vuoitit Nm-golli ja medáljaid Klippan Openis Ruoŧas ja Dan Kolovas Bulgárias.