Hástet searvat govvagilvui
Searvva čalmmustahttit čáppa Barentsguovllu erenoamášvuođaid– sáhtát vuoitit 10 000 kruvnnu!
Discover Barents lea almmuhan govvengilvvu, ja buohkat geat liikojit govvet bovdejuvvojit searvat! Govven gilvvus lea Barentsguovlu guovddážis, ja vuosttas gii čađahii dákkár gilvvu lei Kainuu fylka, Suomas jagi 2017, mas dalle lei ovdagoddedoaibma Barents Regiovdnaráđis.
Rájiid rastá ovttasbargat
Gilvvu váldoulbmil lea ovddidit ja nannet rádjarasttildeaddji ovttasbarggu Barentsguovllus ja ovddidit Barentsguovllu ja čalmmustahttit dan buorebut. Vuosttaš govvengilvvu fáddá lei luondu, ja gilvu lihkostuvai hirbmat bures.
– Don dieđihat iežat gilvui go sáddet govaid maid leat govven Barentsguovllus ja mas nuorat leat fáddán. Mii fuomášahttit ahte olbmot geat leat govvejuvvon galget mieđihit dasa ahte govaid sáhttá almmuhit ja ahte dat sáddejuvvojit govvengilvui. Gilvvu bokte háliidat čohkket govaid main lea buorre kvalitehta ja mat čájehit Barentsguovllu nuoraid árgabeaivvi, muhto daiguin galgá maid sáhttit čalmmustahttit min erenoamáš čáppa guovllu, čállá Natalia Karlsen Finnmárkku Fylkkagielddas preassadieđáhusas.
Ruhtavuoittut
Govvengilvu bistá olles cuoŋománu, ja riikkaidgaskasaš jurie vállje vuitiid miessemánu 2019 mielde. Gilvvu vuoiti almmuhuvvo geassemánu 1.b. 2019. Gilvobohtosat almmuhuvvojit www.discoverbarents. com ja www.barentscooperation. org. neahttasiidduin geassemánu 1.b. 2019. Vuoittut juogaduvvojit ná:
1.vuoitu: 1.000 Euro, 2. vuoitu: 750 Euro, 3. vuoitu: 500 Euro. Lassin golmma buoremus govvii maid jury vállje, besset olbmot neahttasiiddus www. discoverbarents.com jienastit gova masa eanemusat liikojit, ja govva mii oažžu eanemus jienaid vuoitá, ja sutnje mieđihuvvo sierra árvonamma.
Vuoiti beassá doaluide
Jienasteapmi loahpahuvvo seamma áiggi go govvengilvu; cuoŋománu 30. b. 2019. Govvengilvu čalmmustahttojuvvo sosiála mediain, fáddágilkoriiguin #discoverbarents ja #barentsyouth bokte. Son gii vuoitá govvengilvvu vuosttaš vuoittu bovdejuvvo erenoamáš meanuide Barents Regiovdnaráđi čoahkkima oktavuođas mii lágiduvvo golggotmánu álggus. Upmejes, Ruoŧas.