ISÁK boahtá Márkomeanu 20-jagi ávvudeapmái
ISÁK musihkain šaddá dánsa ja feasta Gállogiettis, go Márkomeannu lágiduvvo suoidnemánu 25.-28. beaivvi dán jagi guoktelogát gearddi.
– Diehttelas go ávvudat, de galget Sámi čaffadeamos musihkkárat leat min lávddis, dadjá festiválajođiheaddji Aili Guttorm preassadieđáhusas.
– Lihkostuvvan
Aili Guttorm lea rámis go ISÁK vuot lávke sin lávdái go sis lea ávvojahki.
– Go ISÁK lei min lávddis ovddit háve, 2017:s, de lei joavku jo beaggán viidát Sámis, dan rájes lea sin lihkostuvvan ahtanuššan seamma beaktilit go sii ovdanbuktet lávddis. Maŋimuš jagiid lea joavku johtán sihke stuorra ja smávva festiválain ja konseartalávddiin sihke Sámis ja Norggas, lohká Márkomeanu festiválajođiheaddji.
– Galggaimet fidnet sin iežamet lávdái
– Lei áibbas diehttelas ahte galg- gaimet fidnet ISÁK dán jagáš festiválii, go sihke joavku ja lávlu Ella Marie leat nu mearehis bures lihkostuvvan daid maŋimuš jagiid. Lea dadjat jo veadjemeahttun ahte eat galgga sin čurvet lávdái dán jagi festiválas, dadjá festiválajođiheaddji Aili Guttorm.
Buohkaid opmodahkan go vuittii Stjernekampgilvvu
Mannan čavčča šattai Ella Marie Haetta Isaksen buohkaid opmodahkan go vuittii Stjernekampgilvvu maŋŋá go lei gilvalan lohkameahttun máŋgga šáŋŋeris buoremus sáddenáiggis TV:S.
ISÁK musihkas seaguhuvvojit urbána synthat árbevirolaš luđiin, ja dat dagaha áidnalunddot musihkkagova mas lea sihke čuoddjilis dánsonmusihkka ja jaskes lávlagat ja luođit mat leat devdojuvvon dovdduiguin.
Goalmmát geardde Márkomeanu lávddis
2019:s lea goalmmát geardde go Ella Marie lea Márkomeanu lávddis. Vuosttaš geardde lei Nuoraid Sessions prošeavtta oktavuođas 2016:s go čohkkiimet vihtta nuorra musihkkára ovdanbuktit iežaset musihka oktasaš konsearttas Márkomeanus. Jo jagi maŋŋá lei joavku ceggejuvvon ja Ella Marie bođii ruovttuluotta daid earáiguin ISÁK:S.
– Gilvvus Stjernekamp čalmmustahtii Ella Marie sámi kultuvrra ja musihka olles riikii, lea buorre dovdu oažžut Ella Marie, Daniela ja Alexandera ruovttuluotta festiválii, loahpaha Guttorm preassadieđáhusa