Gohččot Stuoradikki bissehit Nussira doaibmalobi
Sosialisttalaš Gurutbellodat lea ovddidan evttohusa mas gohččot Stuoradikki ođđasit meannudit Nussira ruvkedoaibmalobi. Bellodaga jođiheaddji lohká juohke áirasa galgat váldit ovddasvástádusa dán áššis.
Sosialisttalaš Gurutbellodat lohpidii distaga Nussirášši evttohit loktet Stuoradikki meannudeapmái.
– Mii doalvut Riehpovuona birasskandála Stuoradiggái. Mii evttohit bissehit doaimma. Juohke bellodat ja áirras galgá váldit dan ovddasvástádusa, ii oktage galgga sáhttit čiehkádit, logai Sosialisttalaš Gurutbellodaga jođiheaddji Audun Lysbakken mánnodaga.
Váidit gonagassii stáhtaráđis
Evttohusas namuhuvvo lassin Riehpovutnii Førdevuotna. Goappašat vuonaide lea evttohuvvon merrii luoitit ruvkebázahusaid.
– Miehtá Norgga leat čájehan garra vuostehágu Nussir ASA doaibmalobi ektui mii addui guovvamánu 14. beaivvi. Ovdalaččas lea maid addon sierralohpi luoitit merrii bázahusaid. Seammás lea Nordic Mining ohcan ásahit ruvkedoaimma Engebøváris Naustdal suohkanis, cealká SG evttohusa duogáža čilgehusas.
Sihke Sámediggi ja guovddáš birasorganisašuvnnat leat dieđihan ahte áigot váidit dan doaibmalobi Gonagassii stáhtaráđis. Ákkastallojuvvo ahte ruvkkes leat stuora negatiiva váikkuhusat Riehpovutnii ja boazodollui mii lea dan guovllus.
Veadjemeahttun doaimmahit ealáhusa
Stáhta iežaset fágaetáhtat, nu go Guolástusdirektoráhtta ja Mearradutkaninstituhtta, vuosttaldedje plánaid, go ruvkedoaibma billista dehálaš gođđe- ja guollebáikkiid mat leat Riehpovuonas.
Dat goazada maid vejolašvuođa doaimmahit sámi kultuvrra báikkis mii lea jo hui hearki sisabáhkkemiidda.
– Váikkuhusguorahallamis boahtá ovdan ahte johtingeainnut ja guottetbáikkit billahuvvet Nussira ja Gumpenjuni ruvkke dihte Fálesnuori suohkanis. Ollu bearrašiidda guoská vahát, ja fertejit heaitit boazodoalus, go ii leat vejolaš doalahit nanaguoddevaš ja ekonomalaš boazodoalu dan guovllus. Danne lea Stáhta boazodoallohálddáhus, Norgga Boazosápmelaččaid Riikkasearvi (NBR) ja orohagat cealkán ahte lea veadjemeahttun doaimmahit boazodoalu dan guovllus, vaikko gáibiduvvojit eavttut maid bidjet váidudeaddji doaibman, dieđiha SG.
SG čállá maid evttohusas ahte ruvkebázahusat mearas eai billis dušše eallima vuonas, muhto máiddái eallima gáttis. Plánejuvvon ruvke lea Fieddara orohagas ja Fálá orohaga johtinguovllus. Goappašat orohagain leat unnon guohtuneatnamat, billistuvvon eatnamat, ja ožžon áitagiid ođđa sisabahkkemiidda guohtunguovlluin, seammás go gáibidit unnidit boazologu vai boazolohku heivehuvvo dan ektui go guohtuneatnamiid sturrodat unnu.
Vurdet 20 jagi bistit doaimma
Birasváikkuhusat sáhttet sakka stuorrut. Guokte miljovnna tonna lossametálla ruvkebázahus galgá jahkásaččat gurrejuvvot merrii Riehpovutnii, ja doaibma vurdojuvvo bistit 20 jagi.
– Lea seamma ollu go 17 guorbmebiilla dievva bázahusat juohke diimmu njuolga dan vutnii masa lea biddjon sierra suddjen vai váldit vára ovtta dain deháleamos luossanáliin mii lea Norggas. Bázahusat goaridit dorski, sáiddi, salliha, juvssu, báldája findara, dasa lassin billista luossanáli ovddas mii lea Riehpovuonajogas, mii lea okta Norgga buoremus luossajogain.
Bivdet Stuoradikki gohččut ráđđehusa
Dáinna duogážiin ovddidit Sosialisttalaš Gurubellodaga logi áirasa ovttas Karin Anderseniin:
– Stuoradiggi bivdá ráđđehusa geassit Nussir ASA doaibmalobi, ja hilgut Nordic Mining fitnodahkii addimis doaibmalobi.
Evttohusa leat Audun Lysbakken, Kari Elisabeth Kaski, Lars Haltbrekken, Arne Naevra, Freddy Andre Øvstegård, Solfrid Lerbrekk, Petter Eide, Torgeir Knag-fylkesnes, Sheida Shangratash ja Mona Fagerås vuollaičállán.
Ávžžuhus eará bellodagaide
SG nubbejođiheaddjis Kirsti Bergstøs lea ávžžuhus eará bellodagaide ahte berrejit čuovvolit evttohusa.
– Mii ávžžuhit buot eará bellodagaid čuovvolit ávžžuhusa, jurdilit nuppes ja miehtat ođđasit meannudit ášši. Earenoamážit sii geat leat vuostá, berrejit jienastit vuostá, lohká Bergstø.
– Ii livčče beare maŋŋit gáhtat
Bergstø namuha Álttáakšuvnna, man oktavuođas gáhte easka maŋŋel.
– Sii, geain lei fápmu dalle, gáhte maŋŋel. Dál livččii vejolašvuohta gáhtat áiggil. Dát lea duođai birasskándala, eat ge mii sáhte dohkkehit ovdamearkka dihte ahte mearra adno ruskaduvdnin, dat han lea borramušgárri.