– Skuter ja biila BEAŠKKEHEDJE OKTII váralaš rasttildanbáikkis
Politiija moaitá báikki gokko máđija manná rastá geainnu
Sullii beannot kilomehtera olggobealde Kárášjoga márkanbáikki, Suoma guvlui, beaškkehedje biila ja skuter oktii. – Rasttildanbáiki lea váralaš, dadjá politiija.
Lihkohisvuohta dáhpáhuvai doppe gos skuterláhttu rasttida Suomaluotta, sullii beannot kilomehtera olggobealde Kárášjoga márkanbáikki.
– Min dieđuid mielde ii leat skutervuoddji geahčestan márkanguvlui ovdal rasttildii luotta. Son lei boahtimin váris ja mannamin joga guvlui, dadjá Kjell Magne Grønnli, gii jođihii politiijaid barggu lihkohisvuođabáikkis.
Báikkis lei njalkkas
Báikkis gos lihkohisvuohta dáhpáhuvai lei hui njalkkas ja lei jiekŋa luotta alde, sáhttá Grønnli duođaštit. Son muitala maid ahte biilavuoddji oinnii skutera geaidnoravddas, nu ahte biilavuoddji ložžii gása vai lea gearggus goazastit jus skuter manná geainnu ala.
– Báikkis lea leahttomearri 80 km/d, ja min dieđuid mielde lea biillas leamaš arvat unnit leahttu go 80 km/d, go lihkohisvuohta dáhpáhuvai, dadjá politiija.
Fasttes luoddaravda
Báikkis gokko skuterláhttu rasttida biilaluotta lea fasttes ravda man ala skuter ferte gorgŋet ovdal beassá eret luottas. Grønnli ii árvvoštala ravddas leamaš mihkke dadjamušaid dán lihkohisvuhtii, muhto dadjá ahte ieš dat báiki gokko láhttu rasttida luotta ii leat vuogas. Son ávžžuha sihke gieldda ja luoddadoaimmahusa bargat juoidá rasttidan báikkiin.
– Mun dieđán ahte Kárášjoga gielda lea oččodan vuoliduvvot leahttomeari báikkis 60 kilomehterii diimmus, go dat lea hupmu sihkarvuođas. Muhto Stáhta luoddadoaimmahus ii leat miehtan dasa. Mun ávžžuhan sihke gieldda ja Stáhta luoddadoaimmahusa bargat juoidá, vai báiki šaddá sihkkaris rasttidan báikin.
Grønnli dadjá ahte gieldda bealis fertejit vástidit máid ravddain ja rasttidan báikkiin galgá bargat, muhto son gal ávžžuha guhkidit 60 kilomehtera diimmus leahttomeari vai rasttidan báiki boahtá dan siskkobeallái.
Eai guhkit 60 km/d leahttomeari
Stáhta luoddadoaimmahusas dihtet lihkohisvuođa birra, ja vástidit ahte go politiijat sihtet sin geahččat sihkarvuođa báikkis, de sii dieđusge barget dan.
– Mii fertet geahččat lea go báikkis doarvái buorre oainnádat ja lea go rasttidan báiki doarvái buorre, ja de árvvoštallat máid mii bargat, dadjá Kristian Øvernes Stáhta luoddadoaimmahagas.
Ávvir muitala ahte politiijat evttohit guhkidit 60 km/d leahttomeari, vai lea 60 km/d mearri dakko gos rasttida, dasa ii mieđa Stáhta luoddadoaimmahat.
– Mii leat ovdal hupman gielddain ja politiijaiguin báikki birra, guhkidit 60 km/d leahttomeari, muhto dan mii eat bargga. Mii bargat ja árvvoštallat našunála eavttuid vuođul, gos galgá ja gos ii galgga leat 60 km/d leahttomearri. Die ii leat dakkár báiki gos galgá leat 60 km/d leahttomearri, dadjá Øvernes.
Bargamin áššiin
Kárášjoga gieldda bealis dihtet ahte rasttidan báikkis ii leat buorre johtolatsihkarvuohta ja nu leat ge bargan áššiin guhkit áiggi jo.
– Mii leat oččodan vuoliduvvot leahttomeari báikkis jo guhkit áiggi, muhto Stáhta luoddadoaimmahus ii leat miehtan dasa. Mii fertet ieža gávdnat eará čovdosa báikái, dadjá Kárášjoga doaibmi gielddalaš jođiheaddji Helge Nystad.
Son dadjá áigut vuodjit geahččamin báikkis ja geahččalit gávdnat čovdosa, movt eastadit lihkohisvuođaid oanehis ja guhkit áiggi badjel.
– Mun dieđán ahte ii leat nu buorre nie movt lea dál. Dan máid sáhtašii bargat lea ahte sirdit šilttaid ja rasttidan báikki moaddelot mehter nuortalii, de buoridivččii veaháš oainnádaga báikkis, loahpaha Nystad.