19 OHCCI HÁLIIDIT jođihit ráđđehusa sáme- ja minoritehtapolitihkalaš ossodaga
Sáme- ja minoritehtapolitihkalaš ossodagas (SAMI) lea ovddasvástádus ovddidit ja čađahit stáda politihka mii guoská sámi álbmogii ja eará nationála minoritehtaide. 18 nama leat listtus geat háliidit ossodatdirektevravirgái.
Gielda- ja ođasmahttindepartemeanttas leat birrasii 380 bargi ja doibmet čállin gielda- ja ođasmahttinministarii, ja muđuid politihkalaš jođiheapmái.
Sáme- ja minoritehtapolitihkalaš ossodagas (SAMI) lea bušeahttaovddasvástádus ja hálddahuslaš ovddasvástádus Sámediggái, ja doalaha oktavuođa ja gulahallama ráđđehusa ja Sámedikki gaskka. SAMI:S lea maid ovddasvástádus Riikkaidgaskasaš boazodoalloguovddážii. Ossodagas leat 17 bargi. Departe meanta almmuhii gieskat ossodatdirektevravirggi raba- sin, ohcanáigemearri dievai njukčamánu 10. beaivvi. Dál lea ohcciidlisttu gárvvis.
Sámegiella ii lean gáibiduvvon
Virgealmmuhusas čálii departemeanta ahte ohcet olbmo geas lea juridihkalaš oahppu.
Virgái eai gáibidan sámi duogáža dahje kulturmáhttu.
Almmuhusas čálle ahte lea sávahahtti ahte ohccis lea beroštupmi sámepolitihkkii, sámegillii ja áššesurggiide mat guoskkahit našunála minoritehtaid, dahje ahte ohcci dovdá ossodaga bargosurggiid. Dál lea Kristin Solbjør SAMI ossodathoavda.
Ovddasvástádus láhčit sámiide dili
SAMI lea veahkkin gulahallame departemeanttaiguin ja Sámedikkiin, ja nationála minoritehtaid servviiguin.
Ossodagas lea ovddasvástádus láhčit dili nu ahte sámit besset ovddidit ja nannet sin kultuvrra, sin giela ja sin ealáhusa ja servvodateallima. Ossodagas lea maid ovddasvástádus ovddidit interna- tionála eamiálbmotpolitihka ja oktiiheivehit sámi jearaldagaid davviriikkaid dásis, čilgejuvvo departemeantta neahttasiiddus. Ekspedišuvdnahoavda Bjørn Olav Megard, gii jođiha SAMI ossodaga, ii áiggo ieš kommenteret virgealmmuheami, ja gohčču váldit oktavuođa ráđđehusa preassaossodagain.
Ii leat lihkostuvvan oažžut vástádusa diehtojuohkinossodaga kanálaid bokte.