EAI SEARVVA sámediggeválgii
Sosialisttalaš Gurutbellodat lea mearridan ahte eai searvva 2021 sámediggeválgii. Bellodaga sámepolitihkalaš fierpmádat háliida baicce bidjat searaid ovddidit sámi áššiid gielddastivrrain, fylkkain, Stuoradikkis ja ráđđehusas.
Sosialisttalaš Gurutbellodat lágidii vuosttaš sámepolitihkalaš konferánssa mannan vahkkoloahpa Romssas. Sii geahčadedje bellodaga siskkáldas organiserema sámi áššiid ektui ja digaštalle galgá go bellodat searvat sámediggeválgii 2021:s.
– Eanetlohku mearridii ahte Sosialisttalaš Gurutbellodat ii searvva boahtte sámediggeválgii. Mis lea buoremus sámepolitihkka stuoradiggebellodagaid searvvis, muhto Sámedikki oktavuođas vásihit ahte olu eará bellodagat ovddidit seamma áššiid go mii ja oaivvildit dan seamma go mii. Danin ii soaitte eanemus dárbu Sosialisttalaš Gurutbellodahkii Sámedikkis, muhto baicce gielddastivrrain, fylkkain, Stuoradikkis ja ráđđehusas. Jus muhtimis min bellodaga sámepolitihkalaš berošteddjiin lea miella searvat sámediggeválgii, de lea sis vejolašvuohta ovddastit dakkár bellodagaid maiguin eat gilval eará válggain, čilge Sosialisttalaš Gurutbellodaga sámepolitihkalaš fierpmádaga stivralahttu ja koordináhtor Mikkel Berg-nordlie.
Olu bellodagat
Sosialisttalaš Gurutbellodaga sámepolitihkalaš fierpmádaga sti- vralahttu Mikkel Berg-nordlie geažuha maid ahte soitet leat menddo olu bellodagat mat servet sámediggeválgii.
– Oktiibuot 19 bellodaga serve sámediggeválgii 2017:s. Go leat menddo olu bellodagat, de lea jienasteddjiide váttis mearridit geasa addet jienaset ja oallugat dáidet vásihit ahte jienastit bellodaga mii ii oba beasa ge Sámediggái. Danin lea midjiide deháleabbo geavahit návccaid ovddidit iežamet sámepolitihka gielddain, fylkkain ja Stuoradikkis, dadjá son.
Nannejit doaimmaset
Sosialisttalaš Gurutbellodaga sámepolitihkalaš fierpmádat ásahuvvui diibmá. Sin doaibma bellodagas lea bargat sámepolitihkalaš áššiiguin ja ovddastit sámiid beroštumiid iešguđetge dásiin.
– Mii bargat bellodaga álbmot- válljejuvvon áirasiiguin ja ovdánahttit bellodaga sámepolitihka. Lea hirbmat dehálaš ahte bellodagas lea sámepolitihkalaš fierpmádat go sámepolitihkka lea moalkái ja guoskkaha buot politihkalaš surggiid man nu láhkai, dadjá Berg-nordlie ja geažuha ahte buot bellodagain galggašii sullasaš doaibma.
– Mii oaivvildit ahte buot bellodagain galggašii sullasaš doaibma go dat livččii stuora ovdamunnin sámepolitihkalaš áššiide, lohká son.
Stivra
Sosialisttalaš Gurutbellodaga sámepolitihkalaš fierpmádagas leamaš doaibmi stivra dan rájes go ásahuvvui, muhto mannan vahkkoloahpa konferánssas viiddidedje stivrra čiežain várrelahtuin.
Sámepolitihkalaš lávdegotti 2018-2020 stivrras čohkkájit: Vigdis Siri (Finnmárku), Ánne Márja Guttorm Graven (Finnmárku), Tommy Berg (Finnmárku), Eva Sandersen Hetta (Sosialisttalaš Nuorat ovddasteaddji gii orru Romssas), Odd-are Hansen (Romsa), Ernly Eriksen (Nordlánda) ja Mikkel Berg-nordlie (Lulli-norga). Várrelahtut leat: Ingunn Kristina Kjølås Halvari (Finnmárku), Marit Susanne Utsi (Finnmárku), Siri K. Gaski (Nordlánda), Hilde M G Danielsen (Trøndelága), Bente Nilssen Owren (Lulli-norga), Dina Serine Owren (Sosialisttalaš Nuorat ovddasteaddji gii orru Lulli-norggas) ja Hege Marie Endregård (LulliNorga).
Sosialisttalaš Gurutbellodaga sámepolitihkalaš fierpmádat ásahii maiddái lávdegotti mii galgá hutkat nama fierpmádahkii. Sii mearridedje maiddái lágidit sámepolitihkalaš konferánssaid dávjjit.