Davvin berrešii leat vejolašvuohta ollu buorebut dinet turisttaiguin
Mátta-várjjagis lea vearrosisaboahtu mátkkoštanealáhusa bokte eambbo go logi eará suohkanis Finnmárkkus. Doppe orrot birrasii 10 000 olbmo. Vaikke leat suohkanat Finnmárkkus gos orrot eanet olbmot go Mátta-várjjagis, de leat sis ollu eambbo vearrodienas mátkeealáhusaiguin go eará seamma sturrosaš suohkaniin. Mátta-várjjagii mákset ge mátkkoštanealáhusat 56,2 miljovnna ruvnno vearu. Ovdamearkka dihte lea sis beali eambbo vearrosisaboahtu mátkkoštanealáhusas go Hámmárfeasttas ja Álttás oktiibuot. Dat juo muitala ieš alddis ahte Mátta-várjjagis máhttet dinet mátkeealáhusaiguin.
Jus geahčestat dan guovtti Sis-finnmárkku sámi suohkaniid mátkeealáhusaid vearrodietnasiidda, namalassii Kárášjogas ja Guovdageainnus, de ii leat dán guovtti suohkana mátkeealáhusaid vearromáksimat oba hupmanveara ge. Goappá ge suohkanii mákset mátkeealáhusat 2,3 miljovnna vearu. Jáhkkit mátkeealáhusaiguin livčče ollu buoret vejolašvuohta dinet dán guovtti suohkanis, go beare livččii rievttes aktevrrat. Dan duostat čuoččuhit go goappašat suohkaniin leat dakkár buktagat maid lea álki vuovdit buori haddái, namalassii viiddis ja rikkis meahcceguovllut, guovssahasat oidnojit dálvet measta juohke ija , go lea dávjá jalahas, ja dasa lassin leat goappašat suohkaniin ealli sámi kultuvrra maid lea álki vuovdit. Liikká lea álki vihkkut, ahte suohkaniin oidnojit unnán turisttat vaikke potensiála lea stuoris.
Dán áigásaš turisttat maiddái gáibidit juoga mii dáhpáhuvvá jus galget boahtit makkárge báikái.
Ii leat ge amas ahte Davvi-norgga ja Finnmárkku mátkeealáhusat rahčet oažžut turisttaid vásihit guovssahasaid ja sevdnjesáiggi dáppe davvin. Jus geahčestat rastá ráji Supmii, de doppe dálvet finadit 30 000 turistta Davvi-suomas. Dat dieđus muitala ahte ránnjá riikkas leat duođaid lihkostuvvan, ja erenoamážit dálveturismmain. Muhto duostat čuoččuhit ahte seamma bures sáhtašii Davvi-norga maid lihkostuvvat, muhto de jáhkkit Norgga stáda fertet vuoruhit infrastruktuvrra huksema seamma láhkai, go Suopma lea vuoruhan Davvi-suomas. Ovdamearkka dihte váilu Sis-finnmárkkus dál girdišilju mii lea dehálaš ásahus jus turismmain galgá menestuvvat. Eai ge Davvi-norggas leat biilaluottat ge beare buorit.
Dán áigásaš turisttat maiddái gáibidit juoga mii dáhpáhuvvá, jus galget boahtit makkárge báikái. Sii eai leat vuolgán dušše fal geahččat duoddariid ja lupmalas gieđaid váccašit márkanis. Sii dáhttot dáhpáhusfálaldagaid olles áiggi go leat vuos boahtán. Dan jáhkkit ollu báikkiin Davvi-norggas nákcet, muhto Sis-finnmárkkus, gos lea ealli sámi kultuvrra viiddis meahcceguovlluin, jáhkkit stuora vejolašvuođa dinet bures mátkeealáhusain.