EAI DOHKKET seksuála loavkašuhttimiid

– Mii leat dál hábmeme ehtalaš njuolggadusaid dan ektui mii lea dohkálaš láhttenvuohki min festiválas, lohká festiválahoavda.

Sápmitoo oktavuođas muitalii Riddu Riđu festiválajođiheaddji Sandra Márjá West ahte sii leat 2017:s ásahan ehtalaš njuolggadusaid bargiide, eaktodáhtolaččaide, gussiide ja artisttaide mas sii čilgejit movt sii galget gieđahallat jus bohtet dieđiheamit seksuála illasteami dahje loavkašuhttumi birra.

Eastadit dáhpáhusaid

West čilge ahte sis lea čielga ortnet mii galgá dahkkot jus diekkár ášši čuožžila.

– Mii leat čielgasit čállán vuos mii lea dohkálaš láhttenvuohki ja mii ii leat. Das boahtá maid ovdan juste mii galgá dahkkot jus ieš lea vásihan, oaidnán dahje gullan ahte muhtin lea seksuála unohisvuođaid vásihan. Dan mii leat dahkan vai eastadit diekkár dáhpáhusaid min festiválas.

Áigot čuovvolit

Sámi Musihkkafestivála festiválahoavda Ken Are Bongo muitala sis eai leat ovdal leamaš ehtalaš njuolggadusat, eai ge leat čalmmustahttán Metoo kampánjja ovdal. Muhto dál sii áigot čuovvolit Riddu Riđu.

– Mii leat dál hábmeme ehtalaš njuolggadusaid mat galget doaibmagoahtit dán jagi, ja dat galgá guoskat buohkaide. Mii eat dohkket seksuála loavkašuhttima ja rasismma veaháge, lohká Bongo čielgasit.

Plakáhtat

West muitala ahte diibmá sii ráhkadedje plakáhtaid ja heŋgo daid hivssegiidda. Plakáhtain leat rávvagat gussiide golmma gillii. – Mii leat čállán plakáhtaide mii lea dohkálaš láhttenvuohki ja mii ii leat. Das leat veahá rávvagat dasa ahte mii lea erohus irggástallamis ja seksuála loavkašuhttimis. Son lohká ahte sii ožžo diibmá maid dieđiheami, ja dan sii válde duođas.

– Mii oaččuimet goit ovtta dieđiheami seksuála loavkašuhttimis, ja dat olmmoš gii lei bargan dan šattai guođđit festiválabáikki. Mii ovttasbargat bures vávttaiguin ja politiijaiguin diekkáriid oktavuođas.

Servodatovddasvástádus

Bongo lohká ahte earenoamážit dál, go Sápmitoo lágiduvvui, de dovddai son ain eambbo servodatovddasvástádusa bidjat eastadandoaimmaid johtui.

– Mii háliidit eastadit sihke min iežamet ja gehččiid. Mis lea stuora servodatovddasvástádus dan dahkat. Dat bidjá standárdda midjiide ja eará festiválaide. Mii háliidit ahte gussiin galgá leat oadjebasvuohta min doaluin.

Álkes, muhto dehálaš doaibma

Bongo lohká maid jurddašeame ráhkadahttit plakáhtaid, nu go Riddu Riđđu ja sávvá dan ollet. – Mun gal persovnnalaččat háliidan ráhkadit diekkár plakáhtaid go dat han livččii álkes, muhto dehálaš eastadandoaibma.

Ii ge son loga eahpádussan ge mii geavvá jus muhtin dahká seksuála loavkašuhttima dahje illasteami sin festiválas.

– Ii leat eahpádus ge, mii eat dohkket diekkáriid, ja dalle geavvá njuolga olggos min festiválas, lohká Bongo.

Kárášjoga festiválaid beaivválaš jođiheaddji Kenneth Eliassen ii astan searvat jearahallamii dán áššis.

Govven: Anne Marie Therese Eira Kemi HÁLIIDIT EASTADIT: Sámi Musihkkafestivála festiválahoavda Ken Are Bongo lohká dál ráhkadeame ehtalaš njuolggadusaid seksuála loavkašuhttimiid ektui.

Preassagovva: Riddu Riđđu LOHKÁ LEAMAŠ ÁVKIN: Riddu Riđu festiválajođiheaddji Sandra Márjá West lohká leamaš ávkin go ráhkadedje sihke ehtalaš njuolggadusaid ja plakáhtaid main leat rávvagat.

RÁVVAGAT: Dákkár rávvágiid ráhkadii Riddu Riđđu festivála diibmá, ja dákkáriid sávvá Bongo maid ollet ráhkadit dán jagáš beassášfestiválii.