Skutervuoddji: – Láven ballat dien báikkis

Skutervuoddji muitala oanehaččat iežas vásáhusa, ja dadjá ahte báikkis lea hui heittot oainnádat.

– Mun láven ballat dien báikkis go geaidnu mohkasta diekko lahka, ja de lea hui heittot oainnádat.

– Mun bohten geainnoduohkái ja oidnen ahte suomaguovllus bohtet guokte biilla main lea guh- kes gaska. Mun jurdilin ahte go vuosttaš lea vuodján meaddel, de mun rasttidan luotta. Geahčestin vel márkanguvlui ovdal biila vujii meaddel, ja márkanguovllus ii boahtán mihkke. Go ollejin geainno ala, de fuobmájin ahte márkanguovllus boahtá biila muhto de lei beare maŋŋit. Geahččalin vel lasihit leavttu, muhto in ožžon coavccu ja ii lean vejolašvuohta beassat eret. Muhto lihkus manai dan muttos bures go manai, čilge skutervuoddji.