Ruvke álggahuvvon fas Mátta-várjjagis
Mátta-várjjagagielddas rahpasit ođđa bargosajit go ruvki fas álggahuvvo. Luonddugáhttenlihttu ballá ahte dat dagaha stuora vahága birrasii.
– Dát sáhttá dagahit máŋgačuođi ođđa bargosaji gildii. Doaibma galgá láhččot nu ahte resurssat, dálá infrastruktuvra ja báikkálaš ruvkegelbbolašvuohta ávkkástallo buori ládje, dadjá ealáhusministtar Torbjørn Røe Isaksen NTB preassadieđáhusas. Sátnejođiheaddji Rune Rafaelsen dadjá ahte dá lea stuora beaivi olles Mátta-várjjaga gildii.
– Lean hui movttet ráđđehusa mearrádusas dán áššis. Lean giitevaš buohkaid ovddas geat leat áŋgiruššan vai dát lihkostuvašii, dadjá son aviisii Sør-varanger Avis.
Váidon mearrádus
Direktoráhta mearrádus minerálahálddašeapmái (DMF) bisuhuvvo, muhto muhtun rievdadusat eavttuin.
Sydvaranger eiendom ozai doaibmanlobi juovlamánu 2017:s. Fitnodat oaččui ráddjejuvvon konsešuvnna ođđajagemánu dán jagi, gos earret eará ráddjejedje viiddideami ruvkeguovllus, čállá Sør-varanger Avis.
Fitnodat oaivvilda ahte muhtun eavttut maid mearridedje, eai livčče leamaš gánnáhahttit. Oaivvildedje seammás ahte dat ráddjejuvvon konsešuvdna gáibida doaimmahanvuogi mii ii livčče dohkálaš. Sydvaranger eiendom váiddii danne eavttuid.
Luonddugáhttenlihttu váiddii maid mearrádusa dan sivas makkár váikkuhusat konsešuvdnaguovllus livčče lundui.
– Skandála
Ealáhusdepartemeanta lea mear- ridan ahte muhtun oassi dain fágalaš vuosttaldanákkain direktoráhtas eai berre bisuhuvvot. Dan sadjái deattuhuvvo baicca dat ahte gielda lea juo dohkkehan fitnodaga geavaheami konsešuvdnaguovllus ruvkii.
Luonddugáhttenlihttu váidda ii váldon vuhtii. Dál ballá lihttu ahte doaibma dagaha stuora vahága birrasii.
– Lea skandála go ruvkefitnodat Sydvaranger beassá nuoskkidit Báhčaveaivuona, mii lea nationála luossavuotna. Ovddit háve go dán dáhpáhuvai, de šadde birasváikkuhussat stuorrát, dadjá Luonddugáhttenlihtu jođiheadd- ji Silje Ask Lundberg preassadieđáhusas.
400 bargosaji
Lo-jođiheaddji váldá ovdamearkan ahte ruvkedoaibma dagaha 400 bargosaji.
– Dat lea buorre ođas mii mearkkaša olu sihke Sydvaranger ruvkke bargiide ja Mátta-várjjaga báikkalaš servodahkii. Ruvkedoaibma lea leamaš geađgejuolgi báikkalaš servodagas máŋgačuođi jagi, dadjá Lo-jođiheaddji Hans Christian Gabrielse.