– Ruhtajuolludeamit ealihit festivála
Romssa fylka juolluda masá 2,2 miljovnna ruvnnu festiválaide dán jagi. Márkomeannu oažžu 100 000 ruvnnu golmma jagi badjel, ja dát illudahttá lágideaddji.
Márkomeannu, mii lágiduvvo 20. gearddi boahtte geasi, oažžu Romssa fylkkas 100 000 ruvnnu čuovvovaš golbma jagi.
Go Márkomeanu buvttadeaddji ja beaivválaš jođiheaddji Magnus Storvoll Strømseth gullá dan, de illudahttá dat su.
– Dát lea hirbmat buorre ođas midjiide. Dat addá midjiide muhtinlágan sihkarvuođa ja nanne min doaimma kvalitehta, dadjá son.
Eai birgeše doarjagiid haga
Márkomeannu oažžu jahkásaččat birrasii miljovnna ruvnnu gielddalaš ja stáhtalaš ruhtadoarjjan.
– Gielddaid, fylkkaid ja Sámedikki ruhtajuolludeamit ealihit festivála ja daid haga eat oba beasaše ge lágidit riemuid, muitala Strømseth.
Ruhtadeaddjit vástidit festivála ohcamušaide iešguđetge áiggiide, ja danin lea Márkomennui hui positiiva go ožžot fásta juolludeami golmma jagi badjel Romssa fylkkas.
– Fylkkain ja Sámedikkis gal lávet oažžut vástádusa beanta árrat jagis, muhto muhtin sajiin eai vástit ovdal go giđđat. Go mis lea dihtosis man olu oažžut Romssa fylkkas, de addá dat midjiide eanet friddjavuođa go bargagoahtit boahtte jagi festivála bušeahtain, dadjá buvttadeaddji ja beaivválaš jođiheaddji Magnus Storvoll Strømseth.
Juolludit masá 2,2 miljovnna ruvnnu
Romssa fylkkaráđđi lea mearridan juolludit 2 178 900 miljovnna ruvnnu festiválaide 2019:s. Oktiibuot ohce 37 festivála 4,1 miljovnna ruvnnu fylkkas, 25:s ožžot doarjaga.
– Dán jagi leat lassánan ohccit. Mii leat lihkkoš Romssas gos lágiduvvojit nana buorit festiválat. Dáppe gávdnojit sihke smávva ja stuora festiválat ja juohkehaš gávdná muhtin heivvolaš doaluid alcces. Go ná oallugat ohcet doarjagiid, de šaddá dieđusge vuoruhit go ruđat eai juolo buohkaide, dadjá kultuvrra ja ealáhusaid fylkkaráđđi Sigrid Ina Simonsen preassadieđáhusas.
Miehtá fylkka
Romssa fylkka doarjjaortnet galgá ovddidit festiválaid fágalaš ja kultuvrralaš beliid ja dat galgá nannet festiválaid dáidda- ja kulturdeaivvadanbáikin.
Oktiibuot juolluda fylka njealji festiválii ruhtadeami čuovvovaš golmma jahkái. Muđui juhket ruđaid festiválaide miehtá fylkka. Davvi-romssas ruhtadit guokte festivála, 13 festivála Romssa gávpoga guovllus, vihtta festivála Gaska-romssas ja vihtta festivála Mátta-romssas.
– Romssa fylkka ássiin leat olu festiválavejolašvuođat go min guovllus lea stuora áŋggirdeapmi festiválaid ektui. Mii čevllohallat go nu oallugat barget ja fállet alla kvalitehta dáidda- ja kulturvásáhusaid olbmuide, dadjá Simonsen.