Buot sajiin berrešii vuoliduvvon leahttu gokko mađijat leat rastá biilaluottaid
Mánnodaga beaškkehii biila ja skuter oktii Kárášjogas. Politiija dadjá Ávvirii ahte dat báiki gokko máđija rasttida luotta ii leat vuogas. Son lohká iežas diehtit ahte Kárášjoga gielda lea oččodan vuoliduvvot leahttomeari báikkis 60 kilomehterii diimmus, go dat lea hupmu sihkarvuođas. Dál ávžžuhit politiijaid bealis guhkidit 60 kilomehtera diimmus leahttomeari, vai rasttidan báiki boahtá dan siskkobeallái. Dan doarjut ollislaččat, ahte dákko fertejit vuolidit leahttomeari ovdal geavvá duođalaš lihkuhisvuohta. Dán háve manai sihke skuter- ja biilavuddjiin bures, muhto mot nuppes geavvá jus dákkár bárti deaivida ii leat buorre dadjat. Álkimus ja beaktileamos doaibma lea vuolidit leahtu báikkis gokko skutermáđija rasttida luotta.
Dás ii oba duostta ge jurddašit mot livččii geavvan jus dán skuteris livčče leamaš maŋis reahka mas leat olbmot. Dan oažžut dušše árvvoštallat makkár lihkohisvuohta dat livčče leamaš, muhto lihkus lei dán háve dušše luovos vuoji skuter jođus. Liikká oaidnit dárbbu dákkár riskkaanalysa ovddidit, go Stáhta geaidnodoaimmahat ii mieđit vuolidit leahttu. Kristian Øvernes, Stáhta geaidnodoaimmahagas, muitala ahte sii leat ovdal hupman gielddain ja politiijaiguin báikki birra, ahte guhkidit 60 km/d leahttomeari, muhto dan ii áiggo Stáhta geaidnodoaimmahat bargat. Son lohká geaidnodoaimmahaga bargat ja árvvoštallat našunála eavttuid vuođul, ahte gos galgá ja gos ii galgga leat 60 km/d leahttomearri. Øvernes dadjá ahte die ii leat dakkár báiki gos galgá leat 60 km/d leahttomearri.
Stáhta geaidodoaimmahat berre vuolidit leahtu 60 km/d buot sajiin gokko skutermáđijat rasttildit luottaid.
Dat lea beare álkis oaidnu ja čoavddus Øvernesas, go čiehkada našunálaeavttuid duohkái. Dieđus ii heive dat našunálaeavttuide, go dan mii diehtit ahte Davvi-norggas, ja erenoamážit Finnmárkkus lean eanemus skohtermađijat. Dál baicce berre Stáhta geaidnodoaimmahat váldit dan duođalaččat, go diehtit ahte ollu skutermáđijat Finnmárkkus rasttildit luottaid rastá, ja dávjá dakkár báikkiin gos leahttomearri lea sihke 80 – ja 90 km/d. Stáhta geaidnodoaimmahat berre vuolidit leahtu 60 km/d buot sajiin gokko skutermáđijat rasttildit luottaid. Dalle easkka hupmat johtolatsihkkarvuođa birra. Ii leat ávki goit dušše hoahkat ja geahččat našunálaeavttuide.