Geahččaluvvon ja dohkálaš
Guovddášbellodaga stuoradiggeáirras lea jearran eanandoalloministaris geatnegahtton bealjechippaid birra.
Guovddášbellodaga stuorradiggeáirras Geir Adelseten Iversen lea ovddidan gažaldagaid eanandoallo- ja biebmoministarii Olaug V. Bollestadii.
Son jearrá:
«Makkár fágalaš guorahallan lea dahkkon praktihkalaš váikkuhusaide mat leat vuođđun evttohussii go áigot geatnegahttit boazoealáhusa merket bohccuid bealjebilttuiguin?»
Son čilge maid gažaldagas duogáža manin jearrá. Das lea sáhka boazodoalloláhkarievdadanevttohusas, go ráđđehus áigu geatnegahttit boazoealáhusa merket bohccuid bealjebilttuiguin, vaikke ealáhusorganisašuvdna Norgga Boazosápmelaččaid Riikasearvi ja Sámediggi leat vuostá rievdadussii. Son čujuha maid elliidčálggu leat ovtta vuosttaldanákka.
Dohkkehuvvon boazodoallodieđáhus
Eanandoalloministara Bollestada vástádus lea ahte boazodoallodieđáhus, mii almmuhuvvui 2017 cuoŋománus, lea meannuduvvon ja dohkkehuvvon Stuoradikkis. Son čujuha ahte doppe boahtá ovdan earret eará ahte ásahit láhkavuođu geatnegahttit bealjebilttuin merket bohccuid.
Son čállá maid ahte dál leat juo olu orohagat mat merkejit bohccuid bealjebilttuiguin dahje elektrovnnalaš bilttaiguin. Muhtun orohagat leat merken olles ealu dakkáriiguin, ja muhtumat atnán daid juo moaddelogi jagi juo nállašuhttima oktavuođas.
Son čállá vástádusas ahte gulaskuddama oktavuođas lea maid nu biddjon ahte merket ealu bilttaiguin dahje elektrovnnalaš bilttuiguin galgá láhkii boahtit. Makkár merkenvuohki galgá leat, dan regulerejit maŋŋel láhkanjuolggadusa bokte. Go daid njuolggadusaid ráhkadišgohtet, de galgá sihke Sámediggi ja ealáhus váldot mielde.
Son čállá ahte sii barget dan ektui sáddet Stuoradiggái láhkaárvalusa go evttohit rievdadit boazodoallolága 2019 giđa.