– Stuora lávki rievttes guvlui
Mánnodaga vuolláičállet Sámediggi ja Álttá suohkan historjjálaš ovttasbargošiehtadusa. Sámediggeráđđi Silje Karine Muotka dadjá šiehtadusa stuora ja dehálaš lávkin.
Sámedikkis ja Álttá suohkanis ii leat ovdal leamaš ovttasbargošiehtadus, muhto dál leat sii ovttaoaivilis ja leat gearggus vuolláičállit šiehtadusa. Sámediggeráđđi Silje Karine Muotka dadjá dán dehálaš šiehtadussan sápmelaččaide Álttás.
– Vuosttažettiin lea hui buorre go mii leat ovttaoaivilis šiehtadusa ektui ja leat čohkken ollu čuoggáid maid ektui mii sáhttit ovttasbargat, dadjá son.
Buorida oktavuođa
Muotka muitala šiehtadusa leat sullásaš šiehtadussan go dan mii Sámedikkis lea sihke Romssain, Bådådjuin ja Osloin ovdalaččas ja dáguha ahte šiehtadus ii dagat sámegielahálddašanguovlluid ovdii, muhto baicce boahtá buorrin sápmelaččaide gávpogiin mat leat olggobealde hálddašanguovllu.
– Mu dieđu mielde lea Álttá sápmelaččain leamaš dát sávaldat guhkit áiggi jo, ja dat lea ge maid leamaš min bellodaga válgalohpádus, muitala Muotka.
Stuora sámi suohkan
Go geahččá Sámedikki válgajienastuslogu ja ohppiid skuvllain geain lea sámegielat oahpahus, de boahtá ovdan ahte Álttás leat ollu ássit geain lea sámi duogáš.
Dan seammás lea Áltá okta dain stuorimus boazodoallosuohkaniin. Ovcci orohagas lea geasseorohat Álttás, ja doppe leat birrasiid 30 000 bohcco geasset.
– Šiehtadus galgá ovdánahttit sámi kultuvrra ja giela Álttás. Dá lea stuora lávki rievttes guvlui, dadjá Muotka.
Buorre bargoneavvu
Muotka namuha mánáidgárdefálaldaga ja sámegieloahpahusa áššin mat sáhttet buorránit šiehtadusa geažil.
– Mii leat šiehttan muhtin fáttáid maid birra mii áigut ja galgat ovttasbargat. Mii geavahit ovddalgihtii oalle ollu resurssaid Álttás, ja dat ii galgga hedjonit šiehtadusa geažil. Mus lea doaivva ahte šiehtadus lea buorre bargoneavvu, dan mii leat ovdal oaidnán daid eará gávpogiin gos mis lea šiehtadus, loahpaha Sámediggeráđi Silje Karine Muotka.