Bázzi, ii dušše geađggis dahje muoras
Sámi Dáiddaguovddážis lea dál oaidnimis «Time for Sculpture» nubbi oassi man namma lea «#2 – Sisti, sáras ja streaŋga».
Sámi Dáiddaguovddáš (SDG) golmmaoasat bázzeráidu «Time for Sculpture» nubbi oassi «#2 – Sisti, sáras ja streaŋga» rahppui njukčamánu vuosttaš beaivvi beaivit ja bistá dán mánu maŋimuš beaivái. Dán čájáhusas čájehuvvojit lagabui 20 bácci, dahkkon sisttis, sárrasis dahje streaŋggas. Čájáhusáigodat lea dán mánu lohppii.
– Iešalddis lea dát hui unna dáiddačájáhus, muhto lea hui máŋggabealat ja iešguđetlágan. Vuolgá das maid mo jurddaša go vállje dáid dáidagiid. Nu mo «Ruston nisu» dáidda mii lea oaidnit dego ruston ruovdi. Lea hui eaŋkilit ráhkaduvvon. Lea hirbmat geahpas. Fertiimet čatnat dan gitta, amas ii gobmán. Das ii leat ii veaháš ge ruovdi. Dajuha čalmmi njulgestaga go orru hirbmat lossat, vaikko ii leat, lohká SDG direktevra Kristoffer Dolmen.
Čujuhit áššáigullevaš servodatáššiide
Kárášjoga vuođđoskuvlla oahpaheaddji Heidi Gaup fitná 7Á oahppiiguin dáiddačájehusrahpamis, beaivit.
– Leat vuolgán čájáhusrahpamii geahččat daid iešguđetge ávdnasiid maiguin dáiddárat leat ráhkadan dáidagiid. Olu dáidagiid fáttát leat dat seamma mii mis leamaš skuvllas. Dás oaidnit mii iešguđet bácciid mat leat hui áššáigullevačča skuvlla servodatáššiide, lohká Heidi Gaup ja jearrá oahppiid mo sin mielas leamaš dát dáiddačájáhus.
– Menddo buorre, gullojit ohppit jienádeamen ja oahpaheaddji čaibmá.
Golmmaoasat bázzečájáhus
Golmmaoasat «Time for Sculpture» nammasaš čájáhusráiddus lea váldodeaddu bázzi, dáiddariggi ja objeavttat. Vuosttaš oasis «#1 Muoras árdnan» lei muorra guovddážis, dán nuppi oasis «#2 – Sisti, sáras ja streaŋga» lea dibmásat ávdnasat guovddážis. Dán čájáhusas čájehit 13 dáiddára bargguid. Lea ovttasbargu RDM – Sámi Dáiddamagasiinnain Kárášjogas gos gávdnojit dáid dáiddáriid dáidagat. Čájáhusa kuráhtor dahje dáiddaheiveheaddji lea SDG direktevra Kristoffer Dolmen.
– Vuosttaš čájáhusas «#1 Muoras árdnan», lei guovddážis mo sámi dáiddárat leat duddjon muoras, buhtes muoras dahje liibmejuvvon muoras. Nubbi oassi «#2 – Sisti, sáras ja streaŋga», lea litnásat oassi. Jus jurddašat dáiddahistorjjálaččat dahje báhcán