Konfirmášuvnnaide ráhkkanit
Ávvir lea jearahallan duodjerámbuvrrain maid konfirmánttaide lávejit oastit skeaŋkan ja govvejeaddjis rávvagiid mo govvet konfirmánttaid.
Biret Ánne Haetta Eira, Čiŋat rámbuvrras muitala ahte dál lea áigi goas konfirmášuvdnaskeaŋkkaid jođiha.
– Nieiddaide hui dávjá dáppe ostet silbbaid, giissáid ja liinniid, muitala son.
Haetta Eira lasiha vel ahte bártniide maid lávejit oastit silbbaid, goit dakkár unnit riskkožiid.
Giisá vuogas skeaŋka
Haetta Eira dadjá ge ahte giisá lea hirbmat vuogas skeaŋka, danin go olbmos lea dasa adnu.
– Giisá lea maid dakkár mii sáhttá johtit buolvvas bulvii, ja dainnalágiin lea maid vuogas addit giissá, čilge Haetta Eira.
Anolaš diŋggat
Nuppi duodjerámbuvrras lea Inger Máret Bongo juste gávppašeddjiiguin bargame go Ávvir boahtá jearahallat.
– Na mun vuohttán ahte olbmot ostet eanaš anolaš diŋggaid konfirmánttaide, nu go suohpana, stuora niibbi ja silbbaid. Lea jurdda ahte skeaŋka galggašii bistit guhkit áigge, čilge Bongo.
Gullevašvuohta mearrida
Bongo muitala maid ahte dieđusge, jus konfirmánta ii gula boazodollui, de eai láve gal suohpana ja bielluid addit. – Muhto gal dat gávdnojit olu iešguđetlágan tuvradiŋggat maid nuorat soitet dárbbahit. Nu go guksi ja stuora niibi, čilge son.
Bongo čilge viidáseappot ahte dieđusge jus boazodollui lea gullevašvuohta, de gal suohpan ja biellu lea hui dábálaš skeaŋka sihke nieiddaide ja bártniide.
Silbbat maid bivnnuhat
Vaikko leat olu anolaš diŋggat mat addojuvvojit skeaŋkan, de leat gal silbbat Maritexas maid bivnnuhat.
– Mii vuovdit hui olu unna riskkožiid ja suorbmasiid skeaŋkan maid, loahpaha Bongo.
Govvideaddji rávvagat
Ávvir lea maid humadan Marie Louise Sombyn, guhte lea bargan govvideaddjin guhká dál, ja lea govvidan oallu gávttehasaid.
– Vuosttaš ráva lea ahte muitit liibmarullain buhtistit gávtti, go láđđegáktái álkidit darvánit luonit. Dat eai soaitte oidnot nu bures muđui, muhto govas oidnojit hui bures, dadjá Somby movttegit. Son lasihastá maid ahte konfirmánttat leat juste dan agis, sin ii leat váttis oažžut veahá lihkadit govvedettiin, ja ii ge leat bággu čuožžut sis fiidnát ja jaska.
Dá leat govvejeaddji čieža rávvaga:
1. Liibmarulla váldit mielde.
2. Nieiddaid sihtat guggestit ovddas guvlui, vai riesaldagat njulget ovdal go gieđain de njulget.
3. Bittuid ja dihpiid iskat leat go njuolga.
4. Váldit ovtta mielde gii sáhttá veahkkin detáljaid geahččat.
5. Govvet čuollut maid. Hui fiinnis go nu govve olbmuid.
6. Govvet lahkagovaid buot čiŋain.
7. Jus bártniin lea šávká/čiehgahpir, de govvet go lea oaivvis ja go ii leat.