Háliidit jođihišgoahtit eanandoallopolitihkalaš ossodaga boazodoallojuhkosa
Eanadoallo- ja biebmodepartemeanta lea ohcame ossodatdirektevrra eanandoallopolitihkalaš ossodahkii, boazodoallojuhkosii.
Vihtta dievdoolbmo ja golbma nissonolbmo ohce ossodatdirektevravirgái ovdal go ohcanáigemearri nogai (geahča namaid vuolemusas áššis).
Eanandoallopolitihkalaš ossodagas lea fágaovddasvástádus eanandoallošiehtadussii ja boazodoallošiehtadussii ja jahkásaš šiehtadallamiid ektui daidda šiehtadusaide.
Dasa lassin lea ossodat maid mielde hábmeme Norgga eanandoallopolitihka.
Ossodagas lea maid ovddasvástádus internationála šiehtadallamiidda, ealáhusovdáneapmái ja birasgažaldagaide mat gusket eanandollui.
Sámegiella ovdamunnin
Eanandoallodepartemeanta ohcá olbmo virgái gii lea čielga ja čeahpes jođiheaddji. Sus ferte leat beroštupmi eanandoallopolitihkkii obbalaččat ja boazodoallopolitihkkii earenoamážit.
Virgealmmuhusas čálii departemeanta ahte lea dehálaš ahte ohcci dovdá boazodoalu ja ahte lea bargovásáhus boazodoallosuorggis. Viidásit lea maid ovdamunni jus ohcci dovdá sámi kultuvrra ja hálddaša sámegiela.
Dál lea Marit Myklevold dán virggis, dassážii go ođđa olmmoš virgáduvvo.
Áidna sápmelaš
Eanandoallopolitihkalaš ossodagas lea maid ovddasvástádus Eanandoallodirektoráhta boazodoalloossodahkii, Álttás, ja son gii dál bargá Eanandoallodirektoráhta boazodoalloossodaga direktevran, Liv Berit Haetta, lea okta ohcciin.
Liv Berit Haetta lea Mázes eret ja lea 2017 rájes bargan Eanandoallodirektoráhta boazodoalloossodaga direktevran.
Ávvir ii ožžon Liv Berit Haetta ságaide ovdal go áviisa manai deaddileapmái.
Ii kommentere
Morten Floor, gii dál lea eanandoallopolitihkalaš ossodaga fágadirektevra, boazodoallojuhkosis, lea maid okta ohcciin.
Son ii hálit kommenteret ohcama ii ge muitalit manne son lea ohcan virgái.
– Sáhtán duođaštit ahte mun lean ohcan virggi, eará in hálit kommenteret dán áššis, dadjá son.
Ohccit leat
Thorbjørn Gaarder (63), Chief credit officer, Oslo
Trine Reitan (50), juridihkalaš seniorráđđeaddi, Oslo
Morten Floor (49), boazodoallojuhkosa fágadirektevra, Oslo
Åge Walle (63), advokáhtta, Oslo Punya Raja (26), Ii leat bargu, Oslo Charles Hansen (53), doaimmahatjođiheaddji, Fredrikstad Liv Berit Haetta (46), Eanandoallodirektoráhta boazodoalloossodaga direktevra, Áltá
Peter Ericson (55), Entreprenevra, Härnösand