Čállá sevdnjes čiegusvuođaid birra
– Girjjistan muitalan ollu eanet go dan hearvás eallima. Čálán maiddái makkár lea gahččat ja de fas čuoččahit, muitala Erlend Elias Ávvirii. Vaikko ii leat go 36-jahkásaš, son navdá iežas vásihan eanet go iežát su agis.
Erland Elias Bragstad lea sihke reality-násti, sminkejeaddji, vuoktačuohppi, láidesteaddji ja logaldalli. Dál sáhttá iežas gohčodit girječállin maid.
Maŋŋel iešbiografiija almmuhanfeastta Oslos guovtti vahku áigi lea 36-jahkásaš ožžon ollu fuomášumi ja stuora beroštumi. Sihke noaidi, Astrid Zwart, ja sámi popnásti, Elin Kåven, guhte čuojahii lávllus «First step in faith/oadjebasvuhtii» mainna oasálasttii MGP 2017, leigga ávvudeame almmuheami.
Iešbiografiija «Erlend Elias – fra Tysfjord til Tigerstaden» lea juo bures vuvdojuvvon ja lea juo oalle beakkán áššeprosa-girjjiid hildus.
Háliida olahit nu máŋgasa go vejolaš
Profilerejuvvon stylista lea ovttasbargan Tone Solbergain čálidettiin. – Háliidan «ghost writera» gii ii dovdda mu nu bures ja sáhttá addit mearálaš šuoŋa mu eallimii, muitala Erlend Elias.
36-jahkásaš ii lean nu duhtavaš ovttain árvvoštallamiin mii almmuhuvvui muhtin tabloidaviissas.
– Kritihkar čuoččuhii ahte girjjis lea ila árgabeaivegiella, muhto dainna gal lean hui ilus. Dalle lea girjji álki lohkat ja olaha eanet olbmuid. Girjjis beassá lohkat garra duohtavuođa birra go 13-jahkásažžan vásihin illasteami man birra in leat muitalan go psykologasan. Mu mielas lea dehálaš ahte boahtá oidnosii. Maŋŋel almmuheami lean ožžon lagabui duháha maila olbmuin geat háliidit rámidit mu go nu rahpasit muitalan váttis áššiid. Dat movttiidahttá, dadjá son.
17-jahkásažžan oaččui diagnosa
– 17-jahkásažžan ožžon diagnosa post-traumahtalaš huššagillámuša, post-traumatisk stresslidelse (PTSD), ja lean ollu skihpan baluin mainna ferten eallit agibeaivvi. Livččen galgan muitalit bearrašan nu go illastuvvojin, muhto dan in nagodan. Psyhkalaš bákčasat sajáiduvvet rupmašii ja mus leat bákčasat leamaš rupmašis dan rájes. Ii galggaše navdojuvvot jallan nu go leat psyhkalaš váttisvuođat. Lea dehálaš bearrašii, olbmáide, iežá olbmuide ja erenomážit bargoaddái diehtit maid lea vásihan, muitala Erlend Elias Bragstad.
Áhččis jámii čakčat
Girjji álggus son muitala ahte su áhčči lea jápmán.
– Dan siva geažil lea leamaš loses jahki, muhto girji deattuhage ahte man seavdnjat ain lea, báitigoahtá beaivváš muhtun beaivvi. Mii olbmot muitit dan mii lea positiiva. Čálán maid girjjistan makkár lea leahkit akto, sápmelaš ja homofiila. Mu mielas lea áigi ahte sámi servodagas álget dohkkehit homofiillaid vai eanet olbmot dustet dovddastit ahte leat homofiillat.
– Dát ii leat girji beakkánerlenda birra, muhto muitalus olles Erlend Eliasis, dadjá son, ja deattuha ahte illuda moaddevahkkosaš boddui maŋŋel go máŋga vahku lea bargan oažžut oidnosii girjjis servodahkii. Maŋŋel bottoža álgá gierdomátkkiin miehtá Norgga ja čakčageasi jáhkká ollet Finnmárkui. Leat go dus rávvagat nuorra sámenissoniidda ja -dievdduide geat háliidivčče dovddastit iežaset homofiilan? – Olmmoš ferte šaddat iežas nástin. Lea dehálaš ahte ieš stivret iežat eallimis ja ahte šattat nástin iežat eallimis itge báze statistan nuppi olbmo eallimii, čuoččuha Erlend Elias.