Čállá áššiid birra maid birra ii leat ovdal duostan
Girječálli Sollaug Sárgon lea dál almmuhan goalmmát diktagirjji. «Duđa eallimii» -girjjis lohká son lahkonan eambbo dálááiggi.
– Mun orun dego duostame čállit eambbo otná beaivvi birra, maid in soaitte ovdal dahkan. Lean maid vuodjudan eambbo iežan vásáhusaide, ja lean váldán mielde divttaid maid in leat ovdal duostan almmuhit, muitala Sollaug Sárgon Ávvirii.
Eallima gierdu
Iđut čállá preassadieđáhusas ahte divttat leat čadnon lundui, muhtin háviid oahpes namat báikkiide – dálááiggis, vássánáiggis ja boahtteáiggis.
– Okta báiki lea dehálaš oktii, muhtin dihto áigái – muhtin báikkit leat álo dehálaččat. Nu lea eallima gierdu. Litnásit son govahallá manne galggašii leat ilolaš ja giitevaš, muhto maiddái nuppe ládje son diehtá ahte ilu čuovga sáhttá jáddat, ja manne dat jáddá, čállá lágádus.
Hoahppu ja vuordámušat
Sollaug Sárgon ieš geassá ovdamearkan juste dan divtta mas govviduvvo makkár vuordámušat leat dálá hohppos servvodagas.
– Olbmuide šaddet eambbo psyhkalaš váttisvuođat, ja oažžu jearrat mii lea daguhan dan. Lea go nu preassa servvodagas? Ja lea go nu ahte mii čohkkát loanaiguin ja bábergubaiguin? Dieinna lágiin maid lean eambbo lahkonaddan dálááigái iežan divttaiguin, dadjá son.
Oažžut ruovttoluotta
Girječálli muitala vel ahte son háliida olbmuid oažžut jurddašit eallima gierddu birra, ja movt láhttet nuppiid vuostá.
– Diet soaitá boahtit das go barggan ieš olbmuiguin. Eat go mii jurddaš nu go dološ áiggi leat jurddašan «karma» birra. Lean ieš gesson bajás dainna ja áhkkorohkki lei hui garas juste dainna ahte ii galgga goassege lohkat fasttit nubbái. Dat maid unohasat dagat nubbái, sáhttá boahtit ruovttoluotta, dadjá Sollaug.
Eambbo girjjit
Sollaug Sárgon debuterii diktačállin 2010:s diktačoakkáldagainis «Savvon bálgáid luottastit», mii nominerejuvvui Davviriikkaid Ráđi girjjálašvuođabálkkašupmái 2013:s. Dárogielat veršuvdna «Gå opp gjengrodd sti» almmuhuvvui 2013:s.
Su nubbi diktačoakkáldat «Ii čága čihkosii» almmuhuvvui 2017:s.
Dán goalmmát diktačoakkáldahkii lea Liv Vatle hábmen olggošgova. Sámediggi lea ruhtadan girjealmmuheami. Sollaug Sárgon muitala son lea čállime vel ovtta diktagirjji.
– Juo, lean sáddeme sisa vel ovtta diktagirjji, ja soitet vel eambbo šaddat, dadjá son.