Botke- jedje fásttu
Vaikko ii sáhte boradit go lea ramadan ja áigot ávvudit Norgga našunálabeaivvi, de gávdno dasa čoavddus. Sii vurdet eahkedii vai sáhttet njálgga mállásiid ja gáhkuid borrat.
Norgga ambassadevra palestiinnálaččaid ássanguovllus, Hilde Haraldstad, lei bovden gussiid iežas geahčai miessemánu 17. beaivvi ávvudeapmái.
Ovttas botkejit fástu
Dohko ledje boahtán ollugat geain lea gullevašvuohta Norgii, juoga man ládje.
– Miessemánu 17. beaivvi ávvudit mii muittuhussan midjiide ahte eat galgga atnit friddjavuođa, demokratiija, vuoiggalašvuođa ja ráfi diehttelassan. Árvvut mat leat dehálaččat buohkaide. Dan jáhkán ahte dii, geat lehpet palestiinnalaččaid olbmát, háliidehpet maid friddjavuođa, demokratiija, vuoiggalašvuođa ja ráfi, dajái Hilde Haraldstad sártnis ovdal go bovdii olbmuid botket fásttu eahkedis go sevnnjodii.
Palestiinnalaš musihkkár čuojahii stráŋgačuojanasain liekkus áibmogearddis, ja olbmot návddašedje liegga biepmuid ja njálgga gáhkuid.
Čanai oktavuođaid luđiin
Maiddái dovddus neavttár ja artista Mikkel Gaup lei Israelas čájeheame filmmaid dan vahkku go Eurovision lágiduvvui, ja lei ovttasbargu sihke Sámedikkiin, Guovdageainnu suohkaniin, ja Internašunála Sámi Filbmaguovddážiin. Ambassadevra lei maid bovden su sihke guossin ja guoimmuheaddjin Jerusalemii.
Guoimmuhemiin ja leaikkastallamiin oaččui gussiid mielde juoigat, mii lei hirbmat somá gussiide go besse juoiggastit. Mánát ja rávisolbmot serve áŋgirit mielde go Mikkel oahpahii sin, ja bovttii olu mojiid ja bohkosiid.
Filbmaeahkedat Tel Avivas
Mikkel Gaup lea čájehean ovcci sámi filmma Tel Aviv gávpogis, Eurovision Song Contest oktavuođas.
Ledje olu geahččit doppe, ja Norgga ambassadevra Israelas, Jon Hanssen-bauer, oktan su bargoveagain ledje geahččame filmmaid Tel Avivas.
Birrasii 70 olbmo gehčče 1852 stuimmiid filmma, ja geasuhedje muđuid ollu gehččiid.
Eai botke fásttu beaivet
Sivvan go lágidedje Norgga našunálabeaivedoaluid eahkedis beaivvi ovdal, lei fástuáigge dihte, go dasa leat garra njuolggadusat mii gullá sihke bibmui, juhkosii, borgguheapmái, dálkasiidda ja maiddái seksuála daguide.