– Váttispriváhta bargu mis
Guovdageainnu suohkandoavttir lohká sis váttis barggu árvvoštallat olbmuid, leat go nu buohccit ahte eai sáhte mannat bargui vai sáhttet go bargat. – Mis lea fokus oažžut unnut buohccindieđihemiid, lohká son.
Guovdageainnu suohkandoavttir Tuija Niiranen ii loga iežas lohkan gosge ahte ráđđeolmmái Kent Valio áigu gažadit buohccindieđihemiid maid sii čállet luopmománu.
Son lohká sis lea juo fokus dasa ahte eai galgga guhkes buohccindieđihemiid luomu áigge čállit.
Son lohká maid sis lea praksis nu ahte sii jerret lea go dat olmmoš luomus gii boahtá doaktára lusa, jus sii árvvoštallet dieđihit buohccin dan olbmo.
– Mii eat buohccindieđit pasieantta geas lea nuorvu dahje dakkár buozalmasvuohta mii ii leat nu duođalaš, muhto jus lea rupmašis dávtti doadján, dahje lea duođalaš sivva, de mii gal dieđihit su buohccin, lohká son.
Váttis árvvoštallat
Niiranen lohká ahte sis lea juo bealgoalmmat jagi leamaš praksis ahte eai dieđit pasieantta buohccin jus lea luopmu. Son lohká sin maid addán dieđu vikáradoaktáriidda ahte eai galgga guhkesáigái buohccindieđihit olbmuid luopmoáigge.
– Galget addit dušše oanehat áigái buohccindieđiheami, ja de ferte pasieanta fástadoaktára lusa jus dárbbaha guhkit áigái buohccindieđiheami. Muhto lea váttis árvvoštallat dan man buohcci olmmoš lea. Jus juolggi lea doadján, dahje lea nuorvu, dalle lea álki árvvoštallat earenoamažit luomu áigge. Muhto de leat dat mat dego leat dan ráji alde, lohká son.
Guovdageainnu dearvvašvuođaguovddážis, doaktáriid gaskkas, lea leamašan dakkár praksis juo bealgoalmmat jagi, muhto guovtti maŋemus geasi leat buohccindieđiheamit lassánan. Ávvir jearrá Niiranenis ahte ammahal de leat bahuid buohccin leamašan dat olbmot geat maŋemus guovtti geasis leat dárbbašan buohccindieđihuvvot.
– Na mis lea goit dakkár praksis ja fokus leamašan dan rájes go mun lean álgán deike, bealgoalmmat jagi áigi, ahte eat čále unna sivažiid dihte buohccindieđiheami, lohká Niiranen.