Jønsson ja Eira árvaluvvon jođiheaddjin
May Bente Anita Jønsson Sunndalsøras lea nubbi árvalus sámi girkoráđi jođiheaddjin, mas Sara Ellen Anne Eira lea doaibman maŋemus njeallje jagi.
Sámi girkolaš válgačoahkkin lágiduvvo Romssas Sámi girkoeallinkonferánssa oktavuođas, mii álgá mánnodaga miessemánu 27. beaivvi ja bistá gaskavahkkui.
Searvegottit dat leat árvalan vuos evttohasaid, ja dál lea Sámi girkolaš válgačoahkkima nominerenlávdegoddi árvalan evttohasaid dán válgačoahkkimii.
Válgačoahkkin galgá válljet sámi áirasiid sihke Davvi-hålogalándda ja Lulli-hålogalándda bismagottiide, ja árvalit vihtta olbmo Sámi girkoráđđái, oktan jođiheddjiin. Girkočoahkkin dat vállje formálalaččat loahpas sámi girkoráđi.
– Mávssolaš áigodat
Dálá Sámi girkoráđi jođiheaddji, guovdageaidnulaš Sara Ellen Anne Eira, searvá ođđasit válggaide.
Eira lohká ollu oahppan dan rájes go beasai jođiheaddjedoibmii njealji jagi áigi.
– Lea leamaš hui mávssolaš leat mielde Sámi girkoráđis, Lean oahppan hui olu go lean beassan leat mielde váikkuheame dan movt girku galgá váldit vára sámi girkoeallimis. Ja lea somá go mus lea gilvaleaddji, go dat čájeha ahte lea beroštupmi searvat girkolaš ráđiide ja girkopolitihkkii, dadjá Eira.
– Nanne iešmearrideami
Sámi girkolaš válgačoahkkin lea áibbas ođđa ortnet, man mearridedje diimmá Girkočoahkkimis, ja man vuođul galget dál válljet sámi áirasiid girkolaš bajit ráđiide. Ovdal leat válggat leamaš nu ahte moadde olbmo leat ohcan evttohasaid geaid nammadit válggaide, muhto dál dat dáhpáhuvvá sámi válgačoahkkimis mas evttohasat vel ovdanbuktet iežaset oaiviliid ja politihka. Searvegottit ja bismagodderáđit dat sáddejit olbmuid dan válgačoahkkimii.
– Sámi girkolaš válgačoahkkin lea mielde nanneme sámi iešmearrideami girkus. Lea stuora lávki girkodemokratiijas ahte sámi iešmearrideami bokte ovddiduvvojit evttohusat, dadjá Eira.