Nuorra vuoitit rádjabáhčimiin
Lávvordaga lágidii Kárášjoga báhčinsearvi jahkásaš rádjabáhčimiid. Badjel 100 báhčči serve báhčimiidda gos nuorat ledje dat buoremusat.
Rádjabáhčimat lágiduvvojit Suomaráji lahkosis, Kárášjogas. Lea jahkásaš lágideapmi, ja okta dain báhčimiin Finnmárkkus masa eanemus báhččit servet. Dán jagi ledje 49 gilvobáhčči dieđihuvvon, dasa lassin go birrasii 60 bivdi maid oasálaste báhčimis.
Nuorra vuoitit
Lávvordaga lei nuorra Hámmárfeasta báhčči, Adrian Christoffer Pedersen, gii vuittii. Pedersen ii gilval vel rávesolbmuid luohkás, muhto válljii gilvalit rávesolbmuiguin mannan vahkkoloahpa. Nubbin bođii Kárášjoga báhčči Nils Andreas Eira Olli ja goalmmádin fas Deanu báhčči, Jørn Arve Vedhugnes.
Sotnabeaivvi, go nubbi báhčin lágiduvvui, de ledje áibbas eará vuoitit. Dalle vuittii Kárášjoga nieida, Benedicte Guttorm, nubbin bođii Deanu báhčči Tom Eirik Malin ja goalmmádin Hámmárfeasta Børge Strand-nilsen.
Vuosttaš geardde
Kárášjoga nieida, Benedicte Guttorm, lea rekrutterenluohkáin vuoitán measta visot maid Norggas sáhttá vuoitit. Son lea earret eará vuoitán fealtabáhčima Landsskytterstevnet báhčimis, báhčin masa birrasii 5000 báhčči servet. Muhto rájás ii leat gal vuoitán rávesolbmuid luohkás ovdal.
– Mun lean rekrutterenluohkáin vuoitán rájás ovdal, muhto in rávisolbmuid luohkás. In leat sihkar, muhto jáhkán ahte lea vuosttaš geardde go vuoittán rávesolbmuid luohkás báhčima, dadjá nuorra báhčči.
– Somás báhčin
Rádjabáhčimat, maid Kárášjoga báhčinsearvi ja Grensen bygdelag lágidit fárrolaga, leat dál lágiduvvon 23 geardde, ja lea ge áidna fealtabáhčinšillju Finnmárkkus gos leat elektrovnnalaš báhčinmoalat. Benedicte Guttorm muitala ahte rádjabáhčimat leat hirbmat somás báhčimat, vaikko álo ii mana nu go vuordá.
– Lávvordaga ii mannan nu bures go ledjen vuordán. Dalle in deaivan go 26, 30 láttas, go sivttat eai lean áibbas njuolga. Sotnabeaivvi mun deiven buot 30, ja vel buot 12 finálas. Dá leat hui somás báhčimat, go nuppi beaivvi ráhkaduvvo álkibun ja nuppi beaivvi fas váddáseabbon, ja dohko bohtet maid hui ollu báhččit, muitala Guttorm.
Alla mihtut
Nuorra báhčči muitala iežas hárjehallat ollu vai joksá iežas mihtuid, ja son leage bidjan alcces alla mihtuid vuosttaš jagi go gilvvohallá rávesolbmuid luohkás.
– Dán jagi lea mihttu vuoitit Davvi-norgga meašttirgilvvuid ja dahkat bures Landsskytterstevet fealtabáhčimis, dadjá nuorra báhčči.
Hárjehallá ollu
Vaikko Guttorm lea ge ávvudan russa-áiggi miessemánus, de son dadjá iežas hárjehallan bures dán ge jagi.
– Mun hárjehalan unnimusat guovtte dahje golmma geardde vahkkui birra jagi. Miessemánus ii šaddan nu ollu hárjehallan go ledjen russa. Muhto geasset, go lea luopmu, de hárjehalan eambbo, unnimusat juohke nuppi beaivvi, vai lean gearggus Landsskytterstevnii mii lágiduvvo Evjes, borgemánu vuosttaš vahkku.