Ovdanbuvttii sámi balddonasfilmma
– Máilmmi stuorámus filbmafestiválas čájeheimmet mii filbmaráiddu mas vuođđun leat sámi árbevierut, earret eará stálu birra, lohká ISFI ovddasteaddji Liisa Holmberg.
Liisa Holmberg, gii lea Internašunála Sámi Filbmainstituhta (ISF) konsuleanta, lei goalmmát geardde Cannes filbmafestiválas. Festivála lágiduvvui miessemánu 14. beaivvis 25. beaivái.
– Mun barggan ISFI filbmakonsuleantan ja mis leat máŋga filbmaprošeavtta jođus, sihke Ruonáeatnamis, Kanadas, Alaskas ja Ruoššas. Mii doarjut ja promoteret eamiálbmogiid ja sámi filmmaid.
Ožžo buori responssa
– Cannesis oassálasttiimet mii Frontières Film Marketis gos ovdanbuvttiimet Arctic Chills – eamiálbmogiid horror ja supernatural filbmaráiddu. Prošeakta oaččui buori responssa maŋŋel ovdanbuktima Festiválapalássas, muitala son.
Arctic Chills lea konseapta mas leat guhtta iešguđetlágan oanehisfilmma maid leat buvttadeame.
– Cannesis beasaimet oaidnit dušše guokte minuhta oanehisfilmmain mii orui movttiidahtti. Dál eai leat vel dat filmmat eanet gárvánan, muhto prošeakta lea plánen kinovuosttaščájálmasa 2021:s. Okta ulbmil čájehit dan Cannesis lea ahte filbmaprošeakta galgá oažžut riikkaidgaskasaš gaskkusteami. ISFI doarju filbmaprošeavtta Arctic Chills.
Gelddolaš
– Mus lei veahkkin Imaginenative ovddasteaddji Jason Ryle ovdanbuktit video «Proof of Concept» Palais de Cannes filbmamárkanis. Dan lei gelddolaš ja manai oalle bures. Arctic Chill-oanehisfilmmaid sámi ja eamiálbmogiid rešissevrrat leat Suoma-sámi Sinituuli Kalttopää ja sápmelaš Elin Marakatt, kanadalaččat Jerri Trasher ja Ashleŧ Savard, ja Ruošša Sardana Savvina. Juohke filbma dan viđa filmmas bistá 15 minuhta, vai šaddá dábálaš guhkesfilmma guhkkosaš, mii lea 90 minuhta. Plána mielde galgá dat čájehuvvot dábálaš kinos guovtti jagi geahčen.