Guovddášbellodat Stuorradikkis ja Sámedikkis vuosttaldit bággoindividmerket ealuid
Guovddášbellodat Stuorradikkis ja Sámedikkis vuosttaldit bággoindividmerket ealuid:
Stuorradiggi lea dál dahkamin láhkarievdadusa boazodoalloláhkii, mas galgá bággu individmerket ealuid, man ealáhus ieš ja sámi álbmot leat vuosttildan.
Guovddášbellodat oaivvilda dan láhkarievdadusevttohusa rihkkut álbmotrievtti mearrádusaid iešmearridanrievtti ektui. Guovddášbellodaga Stuorradiggejoavku ja Sámediggejoavku lea sádden oktasaš preassadieđáhusa.
– Lea paradoksa ahte seamma Stuorradiggi mii lea ásahan Duohtavuođakommišuvnna, guorahallan dihtii dan vearrivuođa mii lea dahkkon sámi álbmoga vuostá, dál áigu dahkat ođđa vealaheaddji mearrádusa min váldo álgoálbmotealáhusa vuostá. Dás čujuhuvvo dan garra vuosttildeapmái mii bođii ovdan gulaskuddamis, daddjo preassadieđáhusas.
– Rihkku gustovaš álbmotrievttálaš konvenšuvnnaid
Guovddášbellodat ii doarjjo ráđđehusa ja ealáhuskomitea eanetlogu, ja ávžžuha Stuorradikki sáddet ášši ruovttoluotta danin go dat rihkku gustovaš álbmotrievttálaš konvenšuvnnaid.
– Sámi boazodoalus lea árbevirolaš mearkavuogádat mii doaibmá bures. Guovddášbellodaga mielas lea čielggas ahte dat vuohki mo bohccuid merket, lea siskkobealde sámi álbmoga iešmearrideami. Dákkáraš duođalaš sisabahkken álgoálbmoga kultuvrralaš erenoamášvuođaide ii sáhte čađahit jus ealáhus ja sámit eai leat mielas dasa.
– Eat dieđe sullii ge buot váikkuhusaid
Láhkarievdadusevttohus ii leat man ge muddui guorahallon doarvái, ja Guovddášbellodat oaivvilda mii eat dieđe sullii ge buot váikkuhusaid das maid ráđđehus dál dáhttu Stuorradikki mearridit.
– Dás namuhuvvo earret eará dárbu ođđa infrastruktuvrii, nu mo gárddit, el-rávdnji ja neahtta, elliidčálgu, golut, liigebargu, dihtordieđuid sihkkarastin, sámi kulturdábit ja boazodoallu oassin mátkkoštanealáhusas. Láhkarievdadusevttohus uhkida boazodoalloealáhusa kultuvrralaš seailuma, dadjet loahpas preassadieđáhusas Guovddášbellodaga stuorradiggeja sámediggepolitihkkárat.