– Balan bohccobiergohattiid niedjat
Min Boazu njuovahat lea reastaluvvan
Boazoeaiggát ballá dál biergohatti niedjat boazoeaiggádiidda, maŋŋel go Min Boazu šattai vuollánit go beare olu gárttai vealgi.
Ávvir čálii juo ođđajagemánu loahpas dán jagi, go Min Boazu biergofitnodagas ledje gártan inkassovealggit lahka miljonbeali ruvnno ovddas.
Birrasiid njeallje mánu áigi dajai Min Boazu stivrrajođiheaddji, Øistein Aagesen Ávvirii ná Ávvirii dan birra:
«Stivrra bealis mii árvvoštallat ahte lea 100 proseantta hálddašeapmi ekonomiijain Min Boazu AS fitnodagas. Mieđihan ahte mis leat leamašan veahá rutiidnaváttisvuođat, muhto dat galget dál leat ordnašuvvan»
Dál lea dat inkassovealgi gártan 6,2 miljovnna ruvnno. Boazosápmelaččain ii leat oktage bidjan inkasso bokte gáibádusa, muhto altaposten.no čállá ahte Min boazu lea addán dieđu boazosápmelaččaide geat eai leat ožžon mávssu, ja ahte fitnodat lea bargame vai sii ožžot ruđaidis. Altaposten.no lea ge vuosttažat geat čálle dán birra.
Ballá hatti niedjat
Okta sis gii lea gávpečorraga vuovdán Min Boazu fitnodahkii lea Válgenjárgga boazoeaiggát, Johan Mikkel M. Gaup.
Son vuvddii gávpečorraga daid vuosttaš beivviid ođđajagis.
Son muitala ii lean váttis oažžut ruđaid ja lea visot mákson sutnje mii galggai máksot.
Gaupas lea baicca eará ballu dál badjánan, mii sáhttá geavvat go Min Boazu fitnodat ii leat šat gilvaleame oastit gávpečorragiid.
– Mun gal balan dál nidjet biergohattit boazoeaiggádiidda go ná geavai, lohká son.
Okto márkanis
Gaup čujuha juste fal dan nuppi stuora biergooastái, namalassii Finnmark Rein AS:I.
Son lohká ahte go dušše okta biergooasti lea Finnmárkkus, dat sáhttá váttisvuođaid buktit boazoeaiggádiidda.
– Dál gárttai nubbi njuovahat Finnmárkkus, Finnmark Rein AS, dakkár monopoladillái. Ahte sii leat dat áidna biergooasti Finnmárkkus, ja dalle lea balahahtti ahte haddi sáhttá niedjat, lohká son. – Ii han dál leat šat molssaeaktu gosa galgá vuovdit gávpečorraga, dat lea dušše Finnmark Rein AS, ja dalle han leat sii geat stivrejit hattiid, vástida son.
Min Boazu loktii hattiid
Gaup lohká alddis leamaš buori gulahallama Min Boazu fitnodagain, ja lohká lei suddu go eai ceavzán.
– Eahpitkeahttá lea Min Boazu fitnodat mii dagahii ahte bohccobiergohaddi boazoeaiggádii lassánii. Go mii boazoeaiggádat gártat dakkár dillái ahte ii leat šat molssaeaktu gosa gávpečorraga vuovdá, dat ii leat mu mielas buorre, lohká son.
Šiehtadus Rema 1000:in
Min Boazu Fitnodat ostii vuosttaš gávpečorraga 2016:s, ja vuvde 20 miljovnna ovddas dan jagi. 2017:s niejai vuovdin 11 miljovnna ruvdnui.
Boađus lei – 150 000 ruvnno 2016:s ja 2017:s lassánii vuolláibáza -950 000 ruvdnui.
2018:s ožžo maid šiehtadusa vuovdit Rema 1000 bokte 250 miljovnna ovddas bohccobierggu, ja visot orui manname hui bures.
Min Boazu fitnodagas lei maid šiehtadus Trondheim Slaktehus AS čuohpahagain, čuohppat, cáhpat ja páhkket sin ovddas bohccobierggu.
2018:i čavčča maid ostii Min Boazu fitnodat ođđa mašiinnaid maid Trondheim Slaktehus AS galggai doaimmahit. Dat mašiinnat dađibahábut eai doaibman nu go galge, ja bargu dakko bokte maid manai njoazibut go maid ledje jurddašan.
Dat lea jáhkkimis dagahan ahte Min Boazu AS ii ožžon doarvái johtilit bierggu rámbuvrii vuovdigoahtit, ja mii de loahpas lea dagahan sidjiide máksinváttisvuođaid. Go Ávvir čálii Min Boazu AS inkassovelggiid birra ođđajagemánu loahpas dán jagi, de lei badjel 400 000 ruvnno inkassovealgi sis Trondheim Slaktehus AS:I. Trondheim Slaktehus AS beaivválaš jođiheaddji, Jørgen Naess, dajai Ávvirii vel ahte Min Boazu AS fitnodagas lea 2,3 miljovnna ruvnno vealgi sidjiide, dušše oassi das lea inkassoi sáddejuvvon. Ávvirii ii leat lihkostuvvan oažžut oktavuođa Min Boazu AS beaivválaš jođiheaddjin, Lasse Kvernmon, ii ge stivrrajođiheaddjin, Øistein Aagesenin.
Ii lean maid Finnmark Rein AS beaivválašjođiheaddji, Are Figved, oažžumis ságaide.