Stuorimus tramadol-duogušteapmi dahkkon Norggas
Duollárat gávdne disdaga dan stuorimus tramadol-duolloduogušteami Oslo girdihámmanis mii goassege lea duoguštuvvon Norggas.
Go duollárat rabistedje dan njeallje koaffara guovtti ruoŧŧelaččas, de gávdne 184 000 tableahta.
– Duolloduogušteapmi čájeha ahte leat ollugat geat geavahit dakkár dálkasa mii lea reseaptas Norggas, ja lea vuorjašuhtti duoguštanolahus, seammás go lea servvodatváttisvuohta mii lea stuorrume. Lea stuorra ágga várret geavaheames dakkár dálkasa, lohká duollodirektevra Øystein Børmer.
Son lohká diehtit ahte eambbogat jápmet garra bávččasunnidandálkasiiguin Norggas go heroiinnain, Álbmotdearvvašvuođainstituhta 2016 loguid vuođul.
Eanet duogušteapmi ja lassáneapmi
– Duolloetáhta oaidná stuora lassáneami duogušteamis ja valljodagas. Dán rádjái leat duoguštan 560 000 tramadol-tableahta dán jagi, ja 2017:s lei lohku measta 300 000 tramadoltableahta, lohká duollodirektevra Øystein Børmer.
Dat guokte ruoŧŧelačča geat válddahalaiga disdaga leigga vuolgán Kenyas.
– Mii leat maid vásihan ahte dat stuora tramadol-duogušteamit leat mátkkálaččain geat bohtet Afrihká riikkain, dieđiha Oslo girdihámmana duollu sekšuvdnahoavda Tor Fredriksen.
Goalmmát stuorebuš duogušteapmi
Duolloetáhta gávdná maid unnibuš osiid tramadol mii boahtá poastta mielde, lassin daidda stuorát duoguštemiide mat leat sihke Oslo girdihámmanis ja Svinesundas.
– Otná duogušteapmi lea dat goalmmát duogušteapmi mas leat badjel 100 000 tramadol-tableahta 2019:s. Dat guokte ruoŧŧelačča šattaiga politiijaid háldui maŋŋel duogušteami, lohká Fredriksen.
Tramadol lea dálkkas masa galgá sierra bábir doaktáris, ja leat garra gáibádusat viežžat dálkasa ráji rastá Norgii. Máŋga riikka Eurohpás leat bidjan tramadol-dálkasa narkotihkkalistui.