Eahpidat riektan álbmotmeahcis fállat ealgabivddu buot norgalaččaide
Finnmárkkuopmodat (Fefo) fállá dál bivddu guovtti bivdoguovllus Anárjoga álbmotmeahcis olles Norgga álbmogii. Sii oalgguhit olbmuid meahccevásáhusaiguin doppe gos dat stuora ealggat leat. Geassemánu 6. beaivvi nohká ohcanáigemearri bivdoguovlluide gos bivdojoavkkut šaddet máksit birrasii 70 000 ruvnno, ja vel kilohatti biergguid ovddas. Fefo láhčá bivdojoavkkuide helikoptermátkkošteami Basevuovddis bivdoguovlluide ja fas ruovttoluotta ja báhččon ealggat maid vižžojuvvojit dađistaga helikopteriin.
Vaikke iešalddis dieđus sáhttá mieđihit, ahte 70 000 ruvnno ii leat nu divrras, de aŋkke lea ollu divraseabbo go dábálaš ealgabivdu Finnmárkkus. Dát dieđus ii leat fálaldat earáide go sidjiide geain lea liiggás ruhta oastit lobi bivdit ealggaid doppe. Anárjoga álbmotmeahci ealgabivdu lea ge leamaš oaivebávččasin Fefoi go unnán báikkálaš bivdit háliidit bivdit guovllus gos ii leat lohpi geavahit mohtorfievrruid. Vaikke Fefos lei buorre fálaldat báikkálaš ealgabivdiide, ahte sidjiide lea ordnejuvvon helikoptersáhttu mainna dolvot bivdiid ja biergasiid bivdoguovlluide, ja fas vižžet sin oktan gálvvuin ja biergguiguin. Helikopterfálaldat mávssii 30 000 ruvnno juohke jovkui man bivdit orro dalle divrrašeame.
Dan dáfus dieđus ferte Fefo hutkat eará vuogi bivdit ealggaid álbmotmeahcis vai dohko eai laskka beare haga ealggat. Liikká ferte muitit ahte Anárjoga álbmotmeahcci lea sápmelaččaid guovddáš guovllus, mii lea sámiid anus ja hálddus leamaš don doloža rájes. Dan olis lea ge áibbas čielggas, ahte dát guovllut oktan luonddu, guolle- ja fuođđoriggodagaiguin gullet sámiide. Dasto lea ge guovddáš gažaldat, ahte dorjot go dán mearrádusa guovllu gulli sápmelaččat, namalassii Guovdageainnu ja Kárášjoga ássit. Juste dan dáfus lea ge eahpádusas man riekta lea dát vuohki maid Fefo lea mearridan, vaikke jurdda lea buorre.
Liikká lea čielggas ahte juogalágan bivddu ferte Fefo láhčit dohko, go muđui gal sáhttá luondduroassu das čuožžilit. Aŋkke lei ja lea ain dat vejolašvuohta, ahte addit njuovvanlobi boazodolliide geat dálvet johtet ealuiguin Anárjoga álbmotmeahccái. Dan jáhkášeimmet doaibmat, go boazosápmelaččat leat juo fievrruiguin doppe dálvet ja dálvesiivvu vuodjin ii vaháguhte eatnamiid. Dát lea evttohus man Norgga Boazosápmelaččaid Riikkasearvi lea áigá juo evttohan. Eará vejolašvuohta lea ásahit nuvttá bivddu álbmotmeahccái báikkálaš bivdiide, ahte bivdit dušše mákset helikoptera ja besset njuovvat nuvttá doppe.
Liikká ferte muitit ahte Anárjoga álbmotmeahcci lea sápmelaččaid guovddáš guovllus, mii lea sámiid anus ja hálddus leamaš don doloža rájes.