Filbmii guovžža áldoealu siste
– Mus lea álo leamaš niehku oaidnit guovžža, muhto ii dáinna lágiin, muitala Line Elida Marjavare Pedersen.
Line Elida Marjavare Pedersen oinnii go boazočora, mii lei lahka viesu, álggii ártegit láhttet. Ii lean áibbas sihkar mii dat lei, muhto mearridii filbmet bohccuid go ii lean oaidnán dán láhttenvuogi ovdal.
– Moai geahčaime bohccuid mat ledje guoddán misiid, dás olggobealde min báikki. Ledje jeakkis mii lea veahá guhkkelis, muitala Pedersen.
Láhtten ártegit máŋga beaivvi
Soai isidiin Viggo Pederseniin leigga oaidnán ahte bohccot leat láhtten ártegit máŋga beaivvi, muhto fáhkka jávke buot bohccot sudno eatnamis ja čoahkkanedje jeaggái.
– Fáhkka boahtigohte bohccot juohke guovllus ja čoahkkanedje jeaggái.
Guovža ruohtai áldduid ja misiid guvlui. Pedersen oaččui alla váibmoravkasa, ii ge diehtán maid galgá bargat. Son dorggiidii go galggai filbmet ja zoomet oktanaga go lei ilgadis dáhpáhus su mielas.
Guovža ii goddán maidege dán háve
– Mus lea álo leamaš niehku oaidnit guovžža, muhto ii dáinna lágiin, muitala Line Elida Marjavare Pedersen.
Viggo Pedersen riŋgii boazoeaiggádii Kurt Maggai ja nu son oaččui maid dieđu dáhpáhusa birra ja vulggii geahččat. Son muitala ahte guovža ii fáhten maide dán háve. – Guovža lei bivdime, muhto ii fáhten maide, muhto dan han ii dieđe boahtte háve, muitala Kurt Magga Ávvirii.
Magga muitala ahte sii leat oaidnán eambbo guovžžaid báikkis. Ášši lea dieđihuvvom SNO:I ja SNO lea leamaš báikkis beatnagiin iskame gosa guovža lea mannan. SNO Girkonjárgga seniorráđđeaddi Magne Asheim duođašta ahte guovža lea leamašan báikkis ii ge leat dahkan eará go muosehuhttán ealu. Geahča filmma man Line Elida lea filbmen avvir.no siiddus.