2. geardde luossagonagassan
Čoaska biegga ja čuoika ii bissehan olbmuid searvamis Beskánluossarockii bearjadaga. Son guhte vuittii luossagilvvu lea oktii ovdal maid vuoitán.
Smávva olmmoščearda lei čoahkkanan Bieskenjárgga johkagáddái čuovvut Beskánluossarocka mannan bearjadaga. Oaggungilvui serve sihke mánát ja rávesolbmot. Mánáidgilvvus ledje 18 oassálasti ja rávesolbmuid luossagilvvus fas 41 oassálasti. Oktiibuot godde 2 guoli ja ovtta veajeha.
Oaggungilvvu vuoitit
Mánáidgilvvus vuittii Elle Káren Gaup hárriin, mii dettii 304 grámma. Sara Elen Anna Gaup Eira gottii veajeha.
Son guhte vuittii dán jagáš luossagilvvu lei Jan Tore Solbakken. Son vuittii luosain mii dettii 5,4 kg. Dábálaččat láve gilvvus nu ahte vuoitoluosain oažžu 1000 ruvnno juohke kilográmmas.
Go dán jagi šattai beare okta vuoiti, de manai Solbakken ruoktot olles 10 000 ruvnnain. Son oaččui maiddái Alva guoli ja festiválabileahta. Solbakken lea ovdal maid searvan, ja vuittii gilvvu dalle go vuosttaš geardde lágiduvvui 2014:s. Dalle son vuittii luosain mii dettii 6,5 kg.
Vuorbádeapmi
Go eai lean earát geat godde luosa, de vuorbáduvvui 2. ja 3. sadji buot oassálastiid gaskkas. 2.saji vuoitái lei 5000 ruvnno ja festiválabileahtta.
Dan vuittii Kristian Solbakken. 3. saji vuoitái fas 2500 ruvnno ja festiválabileahtta, ja dan ges vuittii Torbjørn Flor. Johan Anders Baer skeŋkii suovas luosa ja dat vuorbáduvvui Bernt Roger Kåvenii.
Ođas čuoikapárka
Vaikke váldokonsearta ii lean ovdal lávvardat eahkeda, de besse liikká veháš gullat bearjadaga. Kajsa Balto joavkkuin čuojahii moadde lávlaga. Son earret eará juoiggai iežas áhči.
Čuoikapárkkas lei maid musihkkaguoimmuheapmi. Skomáhkár Ánde, guhte lea čuoikapárkka jođiheaddji, lei bovden artistta Poodles boahtit čuojahit olbmuide ja čuoikkaide.
Son oaivvilda Poodles čuojaha dakkár musihka mii geasuha čuoikkaid.
– Dáinna sávan ahte oktavuohta olbmuid ja čuoikkaid gaskka šaddá buoret. Čuoikkat leat min skihpárat, dadjá Skomáhkár Ánde.
– Sápmelaččat ledje vissa hui čeahpi báhčit ovdalis áiggi
Geir Anders Haetta Berg lei boahtán logaldallama doallat sámi juovssa birra. Son maid divttii olbmuid geahččalit báhčit juovssain.
– Dološ áiggi go sápmelaččat juovssain bivde buoidagiid, lávii náhkki šaddat nu fiinnis ja olbmot oaivvildedje sápmelaččat ledje hui čeahpes báhčit. Soite sii siktejedje čalbmái vai buoiddanáhkki ii galgan billašuvvat, muitalii Berg su logaldallamis.