Arvi ii bissehan olbmuid rockemis Luossarockas
Arvi ja čoaskadálki lei lávvardaga Bieskkenjárggas, muhto dat ii bissehan olbmuid rockemis festiválas.
Beskánluossarockas dieđihedje buori movtta ja sihke duhtavaš gehččiid ja lágideddjiid. Lágideaddji lei vuordán 400 olbmo unnimusat, ovdagihtii ledje vuvdon 150 bileahta, muhto leat olu eambbo olbmot boahtán.
– Dáppe lea mannan bures ja olbmot orrot duđavačča. Lean viggan oažžut logu galle olbmo leat, muhto in nagot lohkat, boagusta Beskánluossarocka lágideaddji Stig Arne Somby.
Olbmot návddašedje musihkkaguoimmuheami vaikko lei heajos dálki, muhto dán jagi gal orro buohkat gárvodan dálkki mielde.
Buorre musihkka ja buorre mokta
Geahččit muitalit buori movtta leamen ja ahte leat boahtán deaivvadit olbmuiguin ja návddašit musihka. Ledje sihke nuorat ja vuorrasat čoahkkanan Bieskenjárgii lávvordaga.
Geahččit juige ja njuiko fárus
Dán jagáš juoigit ledje Ingá Márjá Sarre, Biret Risten Sara, Máret Sara, Rávná Anti Guttorm ja Inga Berit Sara. Geahččit návddašedje luđiid ja juige maid fárus.
Maŋŋel juigiid lávkii Kajsa Balto lávddi ala. Son hásttii gehččiid boahtit lávddi lagabui ja movttáskahtii olbmuid.
– Lean nu duhtavaš dáin doaluin ja giitevaš lágideddjiide go nu bures leat láhčán dáppe! čurvii Kajsa Balto gehččiide.
Son lea maid nu ilolaš go olu olbmot leat čoahkkanan Bieskenjárgii ja almmuhii ahte sus almmuhuvvo skearru čakčat.
Eahpesihkar meahcis čuojahit
Maŋŋá go Kajsa Balto lei guoimmuhan, de fas čuojahišgođii nuorra guovdageaidnulaš bárdni DJ Ivan Buljo.
– Mun ledjen eahpesihkar go jerre mus boađán go čuojahit dáppe, smihtten lei nu guhkkin meahcis, muhto go dál lean dáppe, de lea nu buorre mokta ja suohtas didjiide čuojahit, muitalii Ivan Buljo.
Maŋŋá Ivan Buljo de lei Sančuari vuorru guoimmuhit Beskánrockáriid.
– Dáppe lea davvieatnama searat geat čužžot arvvi siste, dajai Sančuari vokalista gehččiide Bieskenjárggas.