Buoridit vuorasolbmuid dili
Mannan vahkku lágidii Kárášjoga Giellaguovddáš ságastallama Stuoradiggedieđhusa «Olles eallima eallit» birra. Dát lea kvalitehtaođastus man ulbmilin lea láhčit buoret dili vuorasolbmuide servvodagas nu ahte sii galget sáhttit eallit buorit eallima ja oassálastit searvevuođas.
Kárášjoga gielda lea juo bargagoahtán ollašuhttit stuoradiggedieđáhusa mihtuid ja ulbmiliid. Dán vahkkus boahtá earret eará fylkkadoavttir Kárášjohkii čoahkkinastit Kárášjoga gieldda hálddahusain, háleštit ja bagadit Kárášjoga gieldda viidáseappot dainna prošeavttain.
Lea máilmmi buorre go Kárášjoga gielda ja eará gielddat dál bargagohtet buoridit vuorasolbmuid dili. Stuoradiggedieđáhusas maid ráđđehus ovddidii miessemánus diibmá ja maid Stuoradiggi dohkkehii juovlamánus diibmá guoskkaha buot beliide vuorasolbmuid eallimis, sihke sin geat orrot ruovttuin ja sin geat orrot institušuvnnain. Váldoulbmilin leat ahte vuorasolbmot galget oažžut buriid eallinjagiid, oapmehaččat eai galgga oažžut nu stuora dikšonoađi ahte oalát váibet ja bargit geat barget vuorasolbmuiguin galget loaktit barggus ja beassat geavahit sin gelbbolašvuođa barggus.
Ii leat ávki čáppa sániin báhperalde jus eai leat ruđalaš návccat daid ollašuhttit.
Muhto, dán buori plánas ge lea čuolbma man sáhttá leat váttis gielddaide nagodit čoavdit ja ollašuhttit stuoradiggedieđáhusa ulbmiliid. Dieđáhusas ráđđehus deattuha ahte ođđa refoarbma ii galgga mielddisbuktit lassigoluid. Dieđáhusas daddjo ahte vuorasolbmuid divššu buorideapmi galgá gokčojuvvot gielddaid friddja dietnasiiguin. Viidáseappot ahte gielddat fertejit čájehit rievdadandáhtu ja ahte gielddat mat nagodit rievdadit doaimmadeaset refoarpma mielde bohtet vuoruhuvvot go juolluduvvo liigedoarjja dála ja ođđa ortnegiid bokte mat leat dán ulbmila váste.
Dat mearkkaša ahte Norgga gielddat ovttaládje bággejuvvojit olašuhttit refoarpma, muhto dan fertejit dahkat lassi ruhtajuolludemiid haga.
Gielddaide main dál lea juo heajos ruhtadilli sáhttá šaddat váttis ollašuhttit ulbmiliid – ja dat čuohcá vuorasolbmuide. Ii leat ávki čáppa sániin báhperalde jus eai leat ruđalaš návccat daid ollšuhttit.