Mákset hávgga ja dápmoha/guvžžá čoliid ovddas
DEANUČÁZÁDAT: NINA dutki, Martin Svenning, muitala preassadieđáhusas ahte deanuluosa predašuvdnaprošeakta jotkojuvvo dán geasi, jagi 2019. 2019:s máksá prošeakta 125,- kruvnna juohke guoli/čoavjji ovddas (dápmot/ guvžá mii lea guhkit go 25 cm ja hávga mii lea guhkit go 15 cm), jus buot dieđut (geahča dás vuolábealde) čállojuvvojit. Ruhta máksojuvvo go bivdoáigodat nohká. Danin lea dehálaš ahte bivdi čállá nama, čujuhusa ja báŋkokontonummara diehtobáhpirii. Jus ii hálit muitalit kontonummara, sáhttá fitnat Deanučázádaga guolástanhálddahusas viežžamin daid.
Diibmá, 2018:s, čoggojuvvojedje 314 hávgga ja 77 guvžžá/ dápmoha Deanučázádagas. NINA ja Deanučázádaga guolástanhálddahus jotket guollečovjjiid čoaggima maid 2019:s. Ulbmil lea čohkket eambbo dieđuid das maid hávggat ja guvžžát/dápmohat borret geassemánus borgemánnui, ja erenoamážit oažžut dieđuid man olu luossaveajehiid dat borret.
– Mii ávžžuhat buohkaid, geat oggot Deanučázádagas, sáddet midjiide guvžžá-/dápoha- ja hávggačovjjiid sisdoalu. Dan sáhttá dahkat guovtti láhkai: 1) olles guolli sáddejuvvo. 2) dušše čoavjii ja oaivi sáddejuvvojit. Dáid lassin vel dieđuid das man guhkki lei ja man olu dettii (livčče vuogas jus čálášii lea go varris vai njiŋŋelas, ja leago gođđoguolli). Guvžžás ferte maid sáddet oasi čuomas, lohká prošeaktajođiheaddji Martin Svenning.
Čális vel dieđu liánttain (ii peannain) goas ja gos leat goddán dan (man guovllus jogas ja guolástansaji), mainna bivdoreaidduin leat bivdán, bivdi nama ja telefuvnnanummara. Dát diehtobábir galgá čuovvut guliid (čovjjiid/ oivviid).
Guliid/čovjjiid ferte nu jođánit go vejolaš galmmihit ja galmmihankássa lea biddjon Kárášjoga Campingplassii (gulahallanolmmoš Asbjørn Guttorm, mobil: 90038345), Jergul fjellstuei (gulahallanolmmoš: Toralv Holmestrand, mobil: 91720686) ja Tana Hotellii (gulahallanolmmoš: Reidar Varsi, mobil: 90116198).
Vuoruhuvvon bivdoguovllut 2019:s
Deanučázádat leat stuoris ja mohkkái ja prošeakta vuoruha vuolit (Sirpmás Máskejohkii) ja bajit Deanučážádaga (Anárjohka; Iškurašjoganjálmmis gitta dasa gokko dat deaivvada Kárášjogain. Kárášjohka Mihkkalbáikkis vulos, Iešjohka Šuoššjávrris vulos).
– Jus galgat lihkostuvvat prošeavttain, de lea dehálaš ahte midjiide sáddejuvvojit nu olu guolit/ čoavjjit go vejolaš. Mii ávžžuhat buohkaid geat bivdet Deanučázádagas 2019:s, sihke báikkálašolbmuid ja vierroolbmuid, sáddet midjiide guolle-/čoavjeiskosiid, ávžžuha NINA dutki ja prošeaktajođiheaddji Martin-a. Svenning.