Ceggejit eambbo dálkekámeraid
Ambulánsagirdivuoddjit lohket dálkekámeraid leat revolušuvdnan sin barggus. Dál bohtet dakkár kámerat vel eanet báikkiide davvin.
Olles Norggas leat dál birrasiid čuođi dálkekámera, man govaid sáhttá geahččat sierra áppas. Norsk luftambulanse iežaset girdivuoddji Jens Fjelnset lea hutkan dán čovdosa moadde jagi áigi. Pilohta ja girdivuodjima ovddidanhoavda Norsk Luftambulase vuođđudusas, Erik Normann, gohčoda dán olles revolušuvdnan.
– Ii gávdnon makkárge čoavddus mas oaidná juste makkár dálki lea iešguđet báikkis. Web-kámerat mat leat biddjon feara gosa, eai doaimma seavdnjadin, ii ge gávdno almmolaš dálkedieđáhus ge mii doaibmá ihkku Finnmárkkus. Dát kámerat doaibmagohte hirbmat bures dakkaviđe, ja leat olu juo veahkehan min gádjunbargguin, dadjá Normann Ávvirii.
Sestet áiggi
Normann muitala ahte sidjiide leat kámerat ávkin oaidnit guđe guovllus lea buoremus vuodjit gádjunbáikái, vai máhttet maiddái válljet makkár ambulánssa sáddejit. Nu ollejit jođáneappot buohcci olbmo lusa ja buoridit maid sihkarvuođa.
Ollu ovdánan
Normann lea girdán ambulánsagirdiin 2001 rájes, ja lohká olu ovdánan dan rájes go son álggii. Dalle oainnát ožžo dálkedieđuid fáksas.
– Mii ovdánit čađat, ja nu sáhttit jođáneappot ja eanebuid veahkehit. Muhto eat leat lahkage ollen mollii. Leat olu báikkit gos adnošii maid dákkár kámera, dadjá son.
Sávvá bures boahtima
Mázii galgá maid biddjot dálkekámera. Máze gádjunveaga jođiheaddji Marit Helene Eira lohká sin duođai dárbbašit dákkár rusttega, ja lea dieđusge duhtavaš go dakkár biddjo Mázii.
– Diet lei ođas munnje, muhto orru hui buorre go boahtá dálkekámera Mázii. Mis leat oainnát leamaš hástalusat dálkkiin. Leamaš maiddái heaggaváralaš dilli pasieanttain go girdi ii leat beassan seaivut dálkki geažil. Orru sihkarvuhtii hui buorre jus dat fal doaibmá, dadjá Eira.