– Leavnnjas lea oadjebas ja buorre LGBQ+ olbmuide, muhto nu ii leat juohke sajis
Pride Porsanger ávvuduvvo nuppes:
Pride Porsanger čuovvola diimmáš doaluid ja lágida dán jagi maid Pride Leavnnja márkanis. – Leavnnjas lea oadjebas ja buorre LGBQ+ olbmuide, muhto nu ii leat juohke sajis máilmmis, lohká lágideaddji.
Diibmá lágiduvvui Pride vuosttaš háve Leavnnjas. Dál seamma go dalle maid lea ávvudeapmi Midnattsrockena oktavuođas.
Ávvir jearrá lágideaddjis manne dákkár doaluid dollet. Ingeborg Walsøe vástida lea eanemusat dušše dan sivas vai servvodat fátmmasta buohkaid ja doalut galget dušše leat suohtastallama dihte, iige leat makkárge rahčamušakšuvdna.
– Leavnnjas lea oadjebas ja buorre LGBQ+ olbmuide, muhto nu ii leat juohke sajis máilmmis. Danne mii oaidnit dehálaččan čalmmustahttit ahte doalut dušše leat hávskin ja suohtastallama dihte, dadjá lágideaddji Ingeborg Walsøe.
Prográmmas lea leavgageassin, sárdnevuorut, ámadadjovuoidan,
bonju-quizat. Doppe guossohit maid gáhku ja basson borramuša. Buot lea nuvttá.
– Doalut leat dušše hávskit, ii ge leat makkárge demonstrašuvdna, muitala lágideaddji Ingeborg Walsøe.
– Go buohkat buktet veahá, de šaddet stuorisin
Walsøe muitala diimmáš doalut ledje lihkkostuvvon ja buohkat ledje duđavaččat. Ožžo beare buori dávistemiid ja lágideaddji doaivu dán jagáš doaluiguin maid lihkostuvvat. Lágideaddji maid muitala ahte sii fidnejit sponsoriid báikkálaš rámbuvrrain:
– Mii leat ožžon olu dain ávdnasiin maid mii dárbbašit. Báikkálaš buvddat addet biepmu, tallearkkaid, gohpuid ja boradanneavvuid, gáfiid ja bruvssaid, oažžut maid hálbbiduvvon gáhkuid láibbohagas. Šaddá stuorisin go juohkehaš addá veahá, muitala Ingeborg Walsøe.
– Begget eanet sajin dákkár ávvudeamit
Gaskavahkku suoidnemánu 10. beaivvi lea ávvudeapmi. Leavgageassin dáhpáhuvvu márkanšiljus ja lea ovttasbargu Porsáŋggu gielddain. Lágideaddji muitala maid ahte báikkálašolbmot leat hui mielas doaluide ja girku maid čájehan doarjaga.
– Pride lea beaggán olu Finnmárkkus ja álggahuvvo eambbo sajiide. Earret eará leat Hámmárfeasttas sullasaš doalut dollon. Dat lea dušše somá go beaggá ja go dávjjit čalmmustahttet servvodaga valljivuođa, loahpaha Ingeborg Walsøe.