Ráhkada roahkkadis HUMORA siskkáldas dialogas
Dovddus sámi standup-komihkkár Trine Lise Olsen lea bargagoahtán dan unna jienažiin mii gullo su oaivvis. Dákkáriin sáhttet boahtit ollu suohttasat. Ja leatge boahtán dan mađe olu suohttasat ahte son lea sáhttán das ráhkadit sierra šovva, mainna lea turneas dán geasi.
Dat unna jienaš mu oaivvis ii leat leamaš unni iige smáđáhkis, nu ahte mun geahččalan dan oažžut orrut jaska, dadjá Olsen, gii lea eret Báhcavuonas.
– Mis lea buohkain siskkáldas dialoga, muhto in leat gullán ovttage hupmame mo dat dahká min buorebun dahje heajubun, nu smihtten ahte lea buorre álgu bargagoahtit iežan jienain. Ja manne dat ii leat mu bealde, go dat han leat mu jurdagat? muitala son Ávvirii.
Mun geavahan iežan jiena čalmmustahttit temáid main beroštan.
Lávddis čoarvegahpiriin
Lávdái boađán čoarvegahpiriin ja luhkain, mat leat veahá «pimpejuvvon» Beyonce-stiillain. Čilgen mo dát gahpir gildojuvvui balddonaspropagánddain, ja dovddan ahte dat lea buorre vuohki čatnat dálá- ja vássánáiggii oktii, ja olbmot leat atnan árvvus dan muitalusa. Dušše moadde geahčči dihte čoarvegahpira birra ovdal go muitalin dan birra, ja dat ahte gahpir seammás máhcahuvvui Sápmái Bååstede-prošeavtta bokte lei dušše rámálmas!
Olsen lea fargga logi jagi bargan standupain. Son lea ovdanbuktán bihtá «Den lille stemmen» dušše njealje geardde dán rádjai. Boahtte čájálmas lea Verdalas suoidnemánu 26. beaivvi ja dan maŋŋel lea fas Báhcavuonas borgemánu 3. beaivvi.
– Gehččiin lean ožžon hirbmat buorre responsa, ja ožžon viđeža Altapostenis. Muđui leat mu olbmát gáhtan go eai leat čájálmassii váldán mielde sin nuorat agi nieiddaid, go sii jáhkket ahte nieiddaide livčče buorre oaidnit dan. Dat mu mielas duođašta ahte humora siste boahtá juoga dehálaš ovdan, dadjá Olsen.
Buorre dialoga Haerlandain
Olsena standupčájálmas «AE har rett!», mii lei dan birra mo lei bajásšaddat Finnmárkkus 1980-logus, lihkostuvai bures ja man lea váttis časkit.
– Dieđusge dovddan dan, das ožžon vihtta guđeža ja ovdanbukten dan ain duos dás viđa jagi badjel, nu ahte šaddá veahá deaddu, muhto seammás lea maiddái buorre faŋádit iežas maŋis, muitala Olsen
Tom Sterri bagadalai «AE har rett!» -šovva, ja dán háve lea fas Anne Kat Haerland Olsena bagadallin.
– Suinna lea leamaš áibbas earenomáš bargat. In jáhke ahte livččen sáhttán ovttainge earáin bargat juste dáinna šovvain. Go son bargagođii mu jurdagiiguin, de šadden veahá gielaheapmi. Nu jierbmái ja háhppil! Ja buot deháleamos lea ahte son lea nu liekkus ja fiinna olmmoš. Oaččuime buori oktavuođa, muitala Olsen.
Steve Martin inspirašuvdnan
Báhcavuona-komihkkárii lea dássažii leamaš positiivvalaš leahkit sápmelaš.
– Geahččit ohppet sápmelaččaid birra veahážiid mielde. Mu arenas lea leamaš buorre čájehit sámi kultuvrra rámisvuođa. Leahkit nissonlaš komihkkár ii leat fas leamaš álo seamma somá dán suorggi ektui. Mu motto lean luoikkahan amerihkálaš komihkkáris Steve Martinis. Son dadjá ahte olmmoš ferte šaddat nu buorre ahte ii oktage sáhte badjelgeahččat du! Dat ii leat suorgi mii mearrida mu vuorbbi, dat leat geahččit! Ja nu guhká go sii háliidit boahtit ja eai beroš mu sohkabealis, de in mun beroš. Leat olbmot geat bohtet šovvaide ja ráhkadit buori vuoiŋŋa, sis lea vuoibmi! Ja leat aŋkke eanaš nissonolbmot geat mannet šovvaide, manne sii eai galgga beassat dovdat iežaset das maid gullet? muitala Olsen.
Dán geasi meine son geahččalit vuoiŋŋastit šovvaid gaskkas.
– Mus leat golbma šovva kaleanddaris; Årvikslandas, Verdalas ja Báhcavuonas. Mun galggan maid Øya-festiválai, dušše geahččin. Dat lea šaddan jahkásaš rituálan gos deaivvan olbmáid ja oahppásiid.