Bearráigehččet fálletgo fitnodagat nuoraide dohkálaš bargoeavttuid
LO geassepatrullja lea dán geasi maid galledan nuoraid geat leat geassebargguin fitnodagain ja gulaskuddan mo sii loktet barggus.
Landorganisasjonen (LO) geassepatrullja lea dán geasi johtán bargosajiid gaskka gos nuorat leat barggus. LO geassepatrullja lea bálvalus mii gullá Norgga stuorámus bargiidorganisašuvdnii. Nu go ovddit gesiid, de leat dán geasi maid iskan movt nuorra bargit loktet bargodilis.
Isket leat go nuorain dohkálaš bargoeavttut
LO čilge sin ruovttusiiddus ahte eanas nuorat ožžot dan masa sis leat vuoigatvuohta bargodilis ja sis leat lága mielde bargoeavttut. Muhto, dađibahábut fuomáša LO geassepatrullja juohke geasi ahte muhtun nuorain ii leat dohkálaš bargodilli. Eai buohkat oaččo dan bálkká masa sis lea riekti, eai beasa váldit bottuid dahje eai oaččo máksot jus barget badjeláiggi.
Galledan fitnodagaid olu báikkiin
Guovdageainnu nieida, Berit Ellen Skum lea dán geasi bargan Finnmárkku LO geassepatruljas.
– Mii leat dán geasi fitnan Girkonjárggas, Čáhcesullos, Várggáin, Báhcavuonas, Deanus, Bearalváhkis, Kárášjogas, Álttás, Guovdageainnus ja Leavnnjas. Juohke báikkis finadit muhtun fitnodagain ja jearahallat nuorain sin bargodili birra. Go finadit nu olu báikkiin, de eat olle nu galli fitnodagas fitnat juohke báikkis, muitaleaba Berit Ellen Skum ja Kristoffer Langeli, gii maid lea mielde LO geassepatruljas.
Dan beaivvi go soai finadeigga Guovdageainnus, de ledje earát LO geassepatruljas fas eará báikkiin galledeame nuroaid bargosajiin.
Eatnasat duhtavaččat
– Dat leat ollugat geat leat duhtavaččat go mii boahtit guossái. Bargit ja fitnodagat váldet min bures vuostá ja mii deaivat olu movttegis olbmuid. Mii leat hui giitevaččat dainna! Muhto, de leat muhtumat geat eai leat nu duhtavaččat go mii boahtit ja imaštallet manne mii boahtit. Muhto, eanemusat deaivat mii movttegis olbmuid geat váldet min bures vuostá, muitaleaba Berit Ellen Skum ja Kristoffer Langli geat leaba vahkku bargan LO geassepatrulja ovddas.