Vurdet olu eambbo olbmuid go ovddit jagiid
Lávttejohtnjálmmis leat lágideaddjit ja bargit dáid beivviid ráhkkanan bures dán jagáš festiválii. Lágideaddji dadjá sii leat áŋgiruššan buot buoridit.
Duorastaga boŋkkiha fas dán jagáš Midnattsrocken-festivála johtui. Suoidnemánu 11.-14. beivviid galgá Lávttejohtnjálmmis fas ávvuduvvot festivála. Bileahttavuovdin lea buori meriin časkán diimmáš vuovdima ja lágideaddjit vurdet olu eanet olbmuid go ovddit jagiin.
– Bileahttavuovdimiin lea mannan mihá buorebut go diibmá ja mii vuordit olu olbmuid. Leat gal ain dát maŋimuš beaivvit mat mearridit man olu bileahtat mannet ja man bures dán jagáš festiválain manná, muitala lágideaddji Sten Rune Pettersen.
Hard Joik Kaféa boahtá ruovttoluotta
Muhtimat kánske muitet moadde jagi áigi lávii vuollatealtá leat gosa sáhtii mannat čohkohallat ja ahte doppe lei nubbi tealtá gos sáhtii návddašit musihka. Dán jagi lea Midnattsrocken bidjan dán guokte oktii ja Hard Joik kafé boahtá ruovttoluotta.
– Olbmot leat váillahan dan tealttá ja mii leat guldalan olbmuid. Hard Joik kaféas vuvdet vuola ja juhkamuša, dasa lassin lea doppe sierra lávdi gos bohtet čuojahit, muitala Sten Rune Pettersen. Hard Joik Kafeas čuojahit dát artistat: Stuck in North, Molluscom, Alex P ja Damage Inc. DJ Peter Pan lea čađat doppe čuojaheame musihka.
Oččodan stuora artisttaid
Midnattsrocken lea dán jagi háhkan stuorra artisttaid geasuhan dihte olbmuid. Lágideaddji doaivu danne lea bileahttavuovdimiin maid mannan olu buorebut. – Mii doaivut ahte lea artisttaid dihte bileahttavuovdimiin lea mannan nu bures, go ovdagihtii leat maid vuvdon olu eambbo bileahtat go ovdal. Dán jagi leat bovden dan bivnnuhis Alan Walkera ja lea vuosttaš háve son čuojaha dáppe davvin, muitala Pettersen. Midnattsrockenii bohtet artistat geat geasuhit sihke nuoraid ja vuorrasat olbmuid. Earret eará bohtet Isák, Intrigue, Nico & Vinz, Backstreet Girls, Terje Tysland ja Ina Wroldsen.
Čeahpes vákta
– Mis leat doarvái ja hui čeahpes vávttat, nugo leamaš eará jagiid maid. Billávuona valáštallansearvi veahkeha min olu. Politiijat leat maid sajis, dadjá Pettersen.
Festivála lea buoret go diibmá
Lágideaddji dadjá ahte sii leat geahččalan buoridit buot festiválas. Leat Vip-saji maid stuoridan, oastán ođđa stohpogálvvuid ja dál ožžot Vip-guossit maid borramuša.
– Mii leat dál jo časkán diimmá festivála buriin marginnain, sihke bileahttavuovdimiin ja doaivut mii leat buoridan festivála dán jagi. Geahččalat álo buoridit min festivála jagis jahkái, muitala Pettersen.