– Skuvllat bargan buori barggu
Finnmárkku fylkkagielda lea almmuhan raportta mas lea geahččan mo fylkkagielda ja skuvllat barget, eastadan dihtii ohppiid guođđimis skuvlla gaskan. Sámi joatkkaskuvla Kárášjogas lea earret eará álggahan nuppi jagi luohká sihkkarastin dihtii ahte oahppit jotket skuvlla ja cevzet.
Leamaš stuorra hástalus ahte joatkkaskuvlla oahppit guđđet joatkkaskuvlla gaskan skuvlajagi. Finnmárkku fylkkadiggi mearridii 2017:s ahte galggai dahkkot hálddahusrevišuvdna mii guoská skuvllaguođđimii. Hálddahusrevišuvdna lea dál gárven «Rapport forvaltningsrevisjon 2017-2020 – Frafall av elever i videregående skole». Fylkkaráđđealmmái Øystein Ruud lohká dál lea gulaskuddan gárvvis ja dat čájeha ahte skuvllat leat bures bargan dáinna hástalusain.
Kárášjoga studieinspektevra, Mette Anti Gaup muitala Sámi joatkkaskuvla lea bidjan olu návccaid eastadit ohppiid guođđimis skuvlla gaskan, ja lohká sii leat iežaset mielas bures lihkostuvvan.
– Lea áibbas eará dilli dál joatkkaskuvllas Kárášjogas, go guhtta jagi dás ovdalis. Boahtte skuvlajagi álggahat vuosttaš luohká TIP, teknihkalaš ja industriija buvttadeami VG1 fágain jahkásaččat, vai oahppit jotket nuppi jagi ruovttuskuvllas. Mii leat oaidnán ahte sii geat jotke nuppi luohkkái, cevzet. Ii livčče lean sihkkar ahte sii livčče dan dahkan jus livčče šaddan fárret Áltái dahje Kirkonjárgii, lohká Mette Anti Gaup.
Olu doaimmat ohppiid loaktimii
Hálddahusrevišuvdna geavaha raporttas Nordkapp ja Hámmárfeastta joatkkaskuvllaid ovdamearkan, iskan dihtii mo Finnmárkku fylkkagielda ja skuvllat lea bargan ulbmila juksama ektui. Fylkkagielda ja skuvllat leat beassan gullat mo sin vuogit leat doaibman ja mas lea buoridanmunni.
– Sáhttet leat máŋga siva manin nuorra olbmot eai sáhte joatkit. Mis lea buorre gulahallan ohppiid ektui ja geahččalat láhčit skuvlla dili nu bures go vejolaš, vai oahppi sáhttá joatkit skuvlla, lohká Mette Anti Gaup.
Son muitala Sámi joatkkaskuvllas leat ráđđeaddit ohppiide ja maŋŋá juovllaid ožžo maid dearvvašvuođabuohccedivššára.
– Mii geahččalat heivehit fágaid, ja árrat kártet oahppi mo dat birge fágaid ektui. Mis lea «jakten på 2-ern» dahje olahit ainge guvtteža árvosátnin go dalle lea ceavzán, čilge Anti Gaup.
Son čilge Sámi joatkkaskuvllas lea earret eará verddebearaš fálaldagat nuoraide, geat bohtet eará guovlluin, sihke skuvlaáiggis ja maŋŋá skuvlla ja ohppiid vejolašvuohta váikkuha iežaset skuvladillái ja oahpahussii.
– Mii leat maid bidjan čielgaseabbo sámi profiilla skuvlii. Boahtte skuvllajahkái leat maid ožžon eanet ohcciid Deanus, lohká Sámi joatkkaskuvlla Kárášjoga studieinspektevra Mette Anti Gaup.
Barget bures
Fylkkaráđđealmmái Øystein Ruud oaidná sihke Nordkapp ja Hámmárfeastta joatkkaskuvllaid bures barget eastadit ohppiid eret gárggiideami joatkkaskuvllain. Son rávve ahte buot joatkkaskuvllat Finnmárkkus berrejit eambbo deattu bidjat vuođđoskuvlla ovttasbargošiehtadusaide, vai vuoruhit «Dan buorre finnmárkkuskuvlla» man ulbmil lea oažžut eanet ohppiid čađahit oahpu.
– Mun háliidan ahte doaimmat árvvoštallojuvvojit nu bures go vejolaš, ja sihkkarastit ahte buot árvvoštallanbohtosat dieđihuvvojit skuvllabargovehkii, loahpaha fylkkaráđđealmmái Øystein Ruud.