Eai goassege leat ná olu bileahtaid vuovdán ovdagihtii
Riddu Riđđu festivála lea olihan bohtosiid maid ovdal eai leat dahkan goassege. – Nanu ja buorre prográmma, jáhkká festiválajođiheaddji ággan dasa.
Riddu Riđđu eamiálbmotfestivála álggii ikte Olmmáivákkis, Gáivuona suohkanis Tromssas.
Dat lea 29. geardde go dát festivála lágiduvvo. Oažžu lohkat ahte festivála lea sturron ahte sturron jagis jahkái, ja dán jagi leat olahan bohtosiid maid ovdal eai leat dahkan.
Ođđá olahus
Dán jagáš Riddu Riđđu prográmmas leat čuohtenáre dáhpáhusa dan viđa beaivvis go festivála bistá. Sii leat vuovdán birrasii 30 proseantta eambbo bileahtaid diimmá ektui, ja eai leat goassege ná olu ovdagihtii bileahtaid vuovdán go dán jagi leat dahkan.
Festiválahoavda, Sandra Marja West čilge ná bohtosa.
– Eat leat noidon maidege, jáhkán dat boahtá das go mii leat buori barggu bargan áiggiid čađa. Jáhkán maid ahte okta ágga lea go mis lea nanu ja buorre prográmma dán jagi, lohká son.
Stuora násti
West namuha ovttatmano máilmminástti, Buffy Sainte-marie, go Ávvir jearrá makkár ártistta jáhkká geasuhit.
– Son lea máilmminásti, ja okta dain dáhpáhusain masa mun hui ládje illudan, lohká son. – Mii lea masa don ávžžuhat buohkaid bidjat áiggii vásihit dán jagáš festiválas?
– Dat gal lea Jeremy Dutcher. Son lea Canada álgoálbmot, Wolastoq nammásaš álgoálbmogiin Amerihkás. Son lávlu iežas gillii, ja lea hui čáffat. Dan berre mannat gullát, lohká West.
– Lea vel nubbi maid ávžžuhan olbmuid fitnat vásiheame, ja dat lea Anna Kaisa Partapuoli čájálmas, «We didnt cross the border. The border crossed us». Partapuoli lea diimmá Riddu Riđđu nuorradáiddár, ja dál sus lea iežas čájálmas dáppe. Jáhkán dat šaddá albma buorre, lohká West.
– Jáhkan Slincraze:s šaddá albma «comeback» Riddu lávddis. Son lea olu vásihan maŋemus jagiid, ja mun lean ilus go son dál lea lávddi alde fas, lohká West.
Vuosttaš geardde Riddus?
West oažžu maid hástalusa Ávviris muitalit maid berre muhtun dahkat gii vuosttašgeardde lea Riddu Riđđus.
– Dalle gánniha Davviálbmoga lávddis fitnat. Doppe beassá oahpásmuvvat inuihtaiguin, ja maid borrat sin árbevirolaš mállásiid, lohká West.
– Riddu siiddas berre maid fitnat, go doppe dáhpáhuvvá nu olu juohke beaivvi ja beaivvi miehtá, árvala West.
– Yurta konsearttas berre maid fitnat. Sis lea sin árbevirolaš musihkka iežaset árbevirolaš orrunbáikkis, nu dat lea erenoamáš. Doppe leat vel unnan sajit, nu dohko ferte doamihit jus galgá beassat sisa, lohká West.
– In diehtán Ruoššas orrot sápmelaččat
Sandra Marja West, lea bajásšaddan Olmmáivákkis, ja lea juo mánnán čuvvon Riddu Riđđu festivála.
Son muitá bures go lávejedje sin viesus fitnat muhtun festiávala oasseváldit guossástallame ja boradeame. West lohká maid son muitá hui bures go muhtun Ruošša sápmelaččat ledje boahtán sin guossái.
– Muittán mun dihten sii eai ipmirdan dárogiela. Viggen eŋgelasgiela singuin hupmat, eai dan ge ipmirdan. Nu mii gulahalaimet muhtun muddui sámegilli, ja dat lei mu mielas hui imaš. Go mun ledjen guđajahkásaš, ja mun in diehtán Ruoššas orro sápmelaččat. Dien muittán hui bures, lohká West.
Riddu Riđđu álggii ikte, suoidnemánu 10. beaivvi, ja loahpahuvvo sotnabeaivvi, suoidnemánu 14. beaivvi.